Abdixhiku - Kurtit: Albin a je i vetëdijshëm që je kryeministër edhe i veriut të Kosovës

Kreu i Lidhjes Demokratike të Kosovës, Lumir Abdixhiku, ka folur në lidhje me një nga kushtet e kryeministrit Albin Kurti për strukturat ilegale në veri të vendit, për të cilat ai tha se duhet të shuhen dhe të bëhet dorëzimi i të gjitha armëve ilegale.

Abdixhiku iu ka drejtuar Kurtit se është përgjegjësi kushtetuese e tij që të bëhet ç’armatosja e veriut.

“Albin a je i vetëdijshëm që je kryeministër edhe i veriut të Kosovës, që heqja e armëve atje është përgjegjësi kushtetuese e jotja dhe e organeve të rendit në Kosovë, nuk është çështje e dialogut me Serbinë. A e din këtë gjë. Si mendon që është kusht ç’armatosja e veriut, është detyrë e Policisë e jotja, e ministrit të Brendshëm” – ka thënë Abdixhiku.

“Jo gjashtë por 22 udhëzime i ke nga Gjykata Kushtetuese. Nuk ka polarizim më të madh në dy tri fjali tua që the sot. Njëherë thua do ta implementoj marrëveshjen e 2013-tës më pas Asociacion të Sharrit, Bjeshkëve të Nemuna. A je i vetëdijshëm çka po flet, si me i pas dy pole të mendimeve. A je mirë?”- shtoi ai.

Në kundërpërgjigje të kreut të LDK-së, Kurti e ka lutur që të ruaj qetësinë dhe racionalitetin dhe se sipas kryeministrit, 22 udhëzimet e kushtetueses tregojnë se sa herë ish-kryministri Isa Mustafa e ka shkelur Kushtetutën.

“Ju lutem ta ruani qetësinë dhe racionalitetin. Qetësi dhe racionalitet. Ato 22 udhëzime tregojnë sa herë kryetari i juaj i nderit e ka shkelur Kushtetutën, profesori që do të thoshin disa, edhe unë”- tha Kurti.

Më tej Kurti tha nuk po e kupton Abdixhikun që, siç tha keu i ekzekutivit “a po thotë që të hyjmë me forcë ne veri?”.

“Ju falënderoj që të gjithë që jeni të pranishëm se ka që edhe nuk janë, që i dëgjuat me vëmendje këto gjashtë kushte dhe që nuk dhatë mendime për heqjen e ndonjërit me përjashtim të deputetit Abdixhiku i cili nuk po e kuptoj a po thotë që të hyjmë me forcë ne veri? A është duke e sugjeruar këtë gjë”- shtoi kryeministri.

Kryeministri i Kosovës, Albin Kurti, në seancën e Kuvendit ka treguar gjashtë kushtet me të cilat Kosova mund ta konsiderojë formimin e Asociacionit të komunave me shumicë serbe.

Gjashtë kushtet e përmenduara nga Kurti:

Duhet të jetë në përputhje me Kushtetutën dhe ligjet në fuqi.
Asociacioni nuk mund të jetë njëetnik, duhet të ndërrojë emrin, nuk mund të ketë bord dhe duhet t’i shërbejë vetëm bashkëpunimit horizontal të komunave sipas Ligjit për vetëqeverise lokale.
Të drejtat e pakicave kombëtare dhe mekanizmat mbrojtës përkatës duhet ta ngërthejnë parimit e reciprocitetit ndërmjet dy shteteve respektive.
Para vendosjes së Asociacionit, strukturat ilegale në veri shuhen dhe bëhet dorëzimi i të gjitha armëve ilegale.
Asociacioni është pjesë e marrëveshjes finale dhe zbatohet pas njohjes reciproke.
Presidenti i Serbisë i tërheq letrat e dërguara te pesë shtetet për mospranimin e Republikës së Kosovës për në BE.

Më 30 janar, organizata gjermane Fondacioni Friedrich Ebert (FES) ka prezantuar draft-statutin për Asociacionin e komunave me shumicë serbe, i hartuar nga kjo organizatë në partneritet me Institutin Evropian për Paqe.

Ky draft statut përmban 7 kapituj me gjithsej 18 nene dhe sipas tij, Asociacioni do të formohej në përputhje me Kushtetutën e Republikës së Kosovës.

Një ditë më vonë, më 31 janar, Ambasada amerikane në Kosovë, mbajti me përfaqësues qeveritarë, liderë politikë e të shoqërisë civile për të diskutuar në lidhje me Asociacionin.

Këshilltari i Departamentit amerikan të Shtetit, Derek Chollet dhe i dërguari i posaçëm i SHBA-së për Ballkanin Perëndimor, Gabriel Escobar kanë ritheksuar edhe njëherë domosdoshmërinë për themelimin e Asociacionit të komunave me shumicë serbe.

Themelimi i Asociacionit është permendur në propozimin e fundit evropian, një plan disa-pikësh i ofruar nga zyrtarët amerikanë e evropianë për Kosovën dhe Serbinë, ndonëse i njëjti ende nuk është bërë publik zyrtarisht.