AAK e fton ministrin e financave në interpelancë

Shefi i Grupit Parlamentar të Aleancës për Ardhmërinë̈ e Kosovës (AAK), Besnik Tahiri, ka thënë se Qeveria Kurti, ju bëri një padrejtësi të madhe pensionistëve, të cilët siç theksoi ai janë kategoria shoqërore që rrezikohen më së shumti nga Covid-19.

“Javën e kaluar ishim dëshmitarë të një padrejtësie që iu bë pensionistëve nga Qeveria e Kosovës. Nuk mjaftoi paaftësia për t’i siguruar vaksinat për ta, ku kjo kategori shoqërore janë kategoria më e rrezikuar nga Covid-19. Për ta rënduar edhe më tej gjendjen e tyre, tani edhe në aspektin financiar përveç atij shëndetësor, kjo qeveri paturpësisht vendosi që t’i ulë shtesat e pensioneve për ta për 1/3 nga shtesa e merituar nga qeveria e kaluar. Ky vendim e dëmton tej mase gjendjen e pensionistëve, që njihet si kategoria me gjendjen më të rëndë sociale”, u shpreh Tahiri.

Tahiri ka treguar se Aleanca do ta ftojë në interpelancë në Kuvendin e Kosovës, Ministrin e Financave Hekuran Muratin, siç theksoi për të dhënë llogari për këtë vendim zhgënjyes.

“Të shtyrë nga gjendja e tyre e rëndë, por dhe nga bisedat me ta ku ndihen të mashtruar dhe të zhgënjyer me këtë qeveri, Grupi Parlamentar i AAK-së do ta ftojë në interpelancë në Kuvendin e Kosovës Ministrin e Financave Hekuran Murati për të dhënë llogari për këtë vendim zhgënjyes. Përveç që është jonjerëzore, është mashtrim që të marrësh vota me premtime për rritje të pensioneve, e t’i ulësh ato që në ditët e para të qeverisjes”, ka shkruar Tahiri në Facebook./21Media