A ka rritje të rasteve të kancerit të gjirit në Kosovë?

Në kudër të muajit të ndërgjegjësimit për parandalimin e kancerit të gjirit, në emisionin “Kallxo Përnime” po debatohet për betejën me kancerin në Kosovë.

Ish-drejtori i Klinikës së Onkologjisë në QKUK, Ilir Kurtishi, ka folur për numrin e rasteve më kancer të gjirit në Kosovë.

Sipas Kurtishit, prej vitit në vit numri i rasteve me kancer të gjirit ka pasur rritje prej 3 deri në 5 për qind.

“Realisht sa kam qenë unë në Klinikë, prej vitit në vit kemi pasur rritje prej dikund 3 deri 5% më përjashtim të vitit pandemik, kur kemi pasur numër më të vogël për arsye të moslajmërimit të femrave por në përgjithësi të qytetarëve për shkak të frikës nga COVID-19 dhe ndalesës të disa shërbimeve”- ka thënë Kurtishi.

Në vitin 2021 numri i grave të diagnostikuara me kancer ka qenë 420 deri në 430.

“Në bazë të të dhënave të SHSKUK-së, numri në vitin 2021 ka qenë rreth 420 apo 430 femra të diagnostikuara me kancer. Por ky numër mund të jetë diçka më i lartë, sepse kemi femra të cilat nuk lajmërohen në klinikë tek ne por marrin trajtim jashtë Kosovës” – ka thënë tutje Kurtishi.

Ai ka thënë se në Kosovë ka një trend të rritjes së rasteve si në të gjitha vendet e rajonit.

Sipas ish-drejtorit të Onkologjisë, kanceri i gjirit zë vendin e parë prej tumoreve në përgjithësi në Kosovë.

Tutje Kurtishi ka folur edhe për faktorët që ndikojnë në rritjen e numrit të rasteve me këtë lloj kanceri.

“Faktorët e jashtëm dhe të brendshëm ndërveprojnë dhe shfaqet sëmundja, shprehitë, mosha, shtyrja e jetës te njeriu, sa më shumë që jetojmë mundësia për të pasur kancer është më e madhe” – ka thënë ai.

Ai po ashtu ka shtuar se çelësi i trajtimit të kësaj sëmundjeje janë kontrollet rutinë që duhet të bëhen.

“Qëllimi i mjekimit të sëmundjes së kancerit është që sëmundja të zbulohet herët, mundësisht në stadin 0 ose 1 dhe çelësi i kësaj është kontrollet rutinë që duhet të bëhen”- ka thënë ai.

Muaji tetor është muaji i ndërgjegjësimit për parandalimin e kancerit të gjirit.

Në kuadër të muajit të ndërgjegjësimit për zbulimin e hershëm të kancerit të gjirit, deputeti i Partisë Demokratike të Kosovës, Bekim Haxhiu, bashkë me anëtarët e Komisionit parlamentar për shëndetësi, kanë vizituar Klinikën e Onkologjisë.

Haxhiu lavdëroi personelin shëndetësor të kësaj Klinike por theksoi mungesën e barnave për terapi onkologjike.

“Ndonëse përkushtimi i personelit shëndetësor është maksimal, shqetësuese mbetet mungesa e barnave për terapi onkologjike, ku furnizimi nga barnat e Listës Esenciale këtë vit ka rënë nën 70% , përderisa vitet e kaluara furnizimi me barna në Onkologji ishte rreth 90%” – shkroi ai në Facebook.

Haxhiu tha se është rritur edhe lista e pritjes për radioterapi dhe barhiterapi për shkak të problemeve që janë shkaktuar në Klinikën e Onkologjisë.

“Për shkak të problemeve që janë shkaktuar këtë vit në Klinikën e Onkologjisë është rritur lista e pritjes për Radioterapi dhe Barhiterapi. Problem shqetësues sipas drejtuesve të klinikës është mungesa e stafit.  Aparaturat mjekësore ekzistojnë, por ka raste kur nuk ka kush të punojë me to, prandaj shumë herë transferohet stafi nga klinikat tjera për t’iu ofruar shërbime pacientëve”- theksoi deputeti Haxhiu.