60 aksidente brenda një jave në rajonin e Ferizajt

60 aksidente janë raportuar në Policinë e Kosovës të kenë ndodhur gjatë javës së fundit vetëm në rajonin e Ferizajt.

Nga këto aksidente, 20 kanë qenë me lëndime [ku 32 persona kanë pësuar lëndime], ndërsa 40 të tjera vetëm me dëme materiale.

Sipas një njoftimi të Policisë Rajonale të Ferizajt, aksidentet ndodhën nga 12.08.2024 deri më 18.08.2024.

Policia njofton se gjatë kësaj kohe ka ndërmarrë një sërë aktivitetesh në identifikimin e kundërvajtësve të ndryshëm në komunikacion me qëllim parandalimin e aksidenteve.

Në kuadër të këtyre aktiviteteve, sipas PK-së, janë shqiptuar 1 mijë e 430 gjoba kundërvajtëse dhe janë hequr 8 patentë shoferë për drejtuesit që kanë shkaktuar kundërvajtje më të rënda në komunikacion.

Policia Rajonale e Ferizajt paralajmëron se do të vazhdojë me aktivitete të shtuara, me synim “parandalimin e aksidenteve në komunikacionin rrugor dhe apelojmë tek shoferët që të bëjnë kujdes në komunikacionin rrugor”.