5 pikat e qëndrimit të AAK-së për dialogun Kosovë-Serbi

Kryetari i Aleancës për Ardhmërinë e Kosovës (AAK), Ramush Haradinaj, ka bërë të ditur se në takim me Kryesinë e partisë, mes tjerash kanë diskutuar edhe për qëndrimin rreth dialogut Kosovë – Serbi.

Haradinaj në Facebook ka njoftuar se qëndrimi i AAK-së për dialogun ka pesë pika.

Në pikën e parë mes tjerash thuhet se askush nga institucionet e Kosovës, përfshirë edhe kryeministrin Albin Kurti, nuk duhet të ndërmarrë veprime sa u përket temave të dialogut me Serbinë e që do e befasojnë Kuvendin e Republikës së Kosovës.

Në pikën 2 thuhet se Aleanca pret njohje reciproke, me marrëveshje obligative ligjore, në kufijtë ekzistues, organizimin aktual të brendshëm kushtetues, karakterin unitar të Republikës së Kosovës.

“Askush nuk ka mandat të dialogojë Kosovën e 17 shkurtit e debatet e ngritura së fundmi për disa të ashtuquajtura “non paper”, nuk janë çështje për diskutim”, thuhet në pikën 3.

AAK-ja do të kryejë të gjitha obligimet lidhur me dialogun, si parti opozitare, vijon pika e 4-të.

Ndërsa në pikën e 5-të thuhet se në rast se vërejnë tendenca që rrezikojnë të ardhmen e vendit, AAK do të jetë në mbrojtje të atyre interesave, me të gjitha mjetet e mundshme demokratike.

Më poshtë e gjeni të plotë publikimin e Haradinajt në Facebook:

Në takim me Kryesinë e Aleancës, mes tjerash kemi diskutuar edhe për qëndrimin tonë rreth dialogut Kosovë – Serbi.

Qëndrimi i Aleancës për Ardhmërinë e Kosovës për dialogun është me sa vijon:

1.Temat nacionale nuk janë ekskluzivitet i askujt. Askush nga institucionet e Kosovës, përfshirë edhe Kryeministrin Kurti, nuk duhet të ndërmarr veprime sa i përket temave të dialogut me Serbinë e që do e befasojnë Kuvendin e Republikës së Kosovës. Askush nuk duhet të hyjë në obligime të fshehta apo të hapura, pa dakordim paraprak me spektrin politik në Kosovë, përkatësisht Kuvendin e Republikës së Kosovës.

2.Aleanca pret njohje reciproke, me marrëveshje obligative ligjore, në kufijtë ekzistues, organizimin aktual të brendshëm kushtetues, karakterin unitar të Republikës së Kosovës.

3.Askush nuk ka mandat të dialogojë Kosovën e 17 shkurtit e debatet e ngritura së fundmi për disa të ashtuquajtura “non paper”, nuk janë çështje për diskutim.

4.Aleanca për Ardhmërinë e Kosovës, do të kryejë të gjitha obligimet lidhur me dialogun, si parti opozitare në Parlamentin e Kosovës.

5.Si parti që kemi qenë konsistentë në ruajtjen e interesave kombëtare, në rast se vërejmë tendenca që rrezikojnë të ardhmen e vendit tonë, do të jemi në mbrojtje të atyre interesave, me të gjitha mjetet e mundshme demokratike.