22 kandidatë fillojnë rrugëtimin ushtarak për t'u bërë kadetë të FSK-së

22 kandidatët e përzgjedhur sot (23.08.2024) në kazermën “Adem Jashari” në Prishtinë, filluan rrugëtimin e tyre ushtarak për t`u bërë kadetë të Qendrës për Studime Universitare (QSU) pranë Akademisë Ushtarake të Forcës së Sigurisë së Kosovës.

Sipas njoftimit të FSK-së, kandidatët gjatë kësaj jave do të testohen në disiplina të ndryshme ushtarake.

“Gjatë kësaj jave kandidatët do të testohen në disiplina të ndryshme ushtarake për të parë edhe një herë gatishmërinë dhe përgatitjen e tyre fizike për t`u bërë kadetë të FSK-së. Forca e Sigurisë së Kosovës çdo vit shkollon gjenerata të reja të kadetëve të cilët pas katër vitesh studimi ushtarak në QSU dhe RIT, bëhen oficerë të FSK-së” – thuhet në njoftimin e FSK-së në rrjetin social “Facebook” më 23.08.2024.