16-vjeçari në Ferizaj gjen portofolin me 625 euro, e dorëzon në Polici

Policia e Kosovës ka njoftuar se mbrëmë, më 08.08.2024 në 22:30h, një 16-vjeçar nga Ferizaj ka gjetur një portofol me para dhe dokumente të humbura në Ferizaj.

I mituri portofolin e gjetur sipas Policisë e ka dorëzuar në stacionin e policisë në Ferizaj.

Policia tha se në portofol, përpos parave në shumë 625 euro kishte edhe dokumente të tjera.

“Në ndërkohë është paraqitur edhe pronari i portofolit të humbur F. B., për ta lajmëruar rastin. Pas procedurave të verifikimit të pronarit, në prani të policisë, pronarit i kthehen paratë 625 euro dhe dokumentet tjera” – tha PK.

Tutje u tha se me këtë rast Drejtoria Rajonale e Policisë në Ferizaj e ka falënderuar qytetarin për gjestin human dhe shembullor me rastin e dorëzimit të portofolit në stacionin e policisë .