​Deputeti goran: Nuk e shohim bllokadën si metodë

Kryetari i partisë së goranëve të Kosovës (JGP), Adem Hoxha e ka quajtur konstruktiv takimin me kandidatin për kryeministër, Albin Kurti dhe pretendetën për presidente, Vjosa Osmani. Ani pse nuk foli për votën e tij, pro ose kundër, Hoxha tha se nuk e shohin bllokadën si metodë për zgjidhjen politike të problemeve. Derisa kërkoi më shumë mbështetje nga qeveria e ardhshme për komunitetin goran.

“Sot kemi pasur një bisedë me Kryeministrin e ardhshëm dhe Presidentin e ardhshëm, biseda u zhvillua në një atmosferë konstruktive. Ne jemi përfaqësues të popullit goran, dhe mbështesim një shoqëri të sinqertë shumetnike në Kosovë…Ne nuk e shohim bllokadën si një metodë për zgjidhjen politike të problemit. Sigurisht, ne gjithashtu kemi kërkesa minimale, në mënyrë që të rritet barazia edhe në institucionet e Kosovës. Kur bëhet fjalë për punësim, ju e dini që komuniteti goran vuan fatin e komunitetit shumicë, por ne jemi specifik dhe kjo specifikë reflekton se goranët janë një komb i vogël dhe për këtë arsye ne besojmë se shoqëria dhe institucionet e Kosovës janë( përkrahin) komunitetit goran të bëjë diskriminim pozitiv për këtë çështje, të mbijetojmë në ato zona sepse fati i çdo gorani është se kur ti mbushë 18 vjet, të shkojë ne gurbet, ta ndalojmë këtë praktikë dhe shpresoj se do të kemi një mirëkuptim me presidentin dhe kryeministrin, dhe ne të jemi të suksesshëm së bashku në atë rrugë”, tha ai.

Edhe përfaqësuesi i Inicativës Rome, Gazmend Salieviq pas takimit me kandidatin për kryeministër, Albin Kurti dhe kandidaten për presidente, Vjosa Osmani nuk e ka garantuar votën karshi tyre. Pas certifikimit të rezultatit zgjedhor të zgjedhjeve të parakohshme parlamentare të 14 shkurtit, në të cilat partia e Kurtit shënoi fitore bindëse, për 22 mars është caktuar mbajtja e seancës konstituive të legjislaturës së tetë të Kuvendit të Kosovës. Përveç konstituimit të kuvendit dhe zgjedhjes së qeverisë, deputetët duhet të zgjedhin edhe presidentin e ri të vendit. Në zgjedhjet e 14 shkurtit, Lëvizja Vetëvendosje ka fituar mbi 50 për qind të votave, duke siguruar 58 ulëse në Kuvend. Partia Demokratike e Kosovës do t’i ketë 19 deputetë, Lidhja Demokratike e Kosovës 15, ndërsa Aleanca për Ardhmërinë e Kosovës 8. RTV21