Albin Kurti - Foto: Facebook

Kurti: Nuk ka burg që e ndal aktivizmin studentor

Kryetari i Vetëvendosjes Albin Kurti reagoi pasi gjykata ua vazhdoi paraburgimin aktivistëve të SKV-së.

“Universiteti i Prishtinës dhe studentët e profesorët e angazhuar politikisht, gjithnjë u kanë prirë ndryshimeve progresiste në historinë e Kosovës dhe kështu do të jetë sërish. Nuk ka burg e paraburgim, persekutim e izolim, që e ndal aktivizmin studentor”, shkroi Kurti në facebook.

Ai konstatoi se me vazhdimin e paraburgimit po frikësohen të rinjtë për të mos u marrë me politikë.

“Përpjekjet e pushtetit për të dëmtuar aktivizmin studentor dhe punën e SKV-së, përkojnë me qasjen e tyre të përgjithshme: ata duan t’i frikësojnë të rinjtë dhe t’i largojnë ata nga politika”, shkroi më tutje Kurti.

Lideri i Vetëvendosjes e dha edhe një arsye pse sipas tij aktivistëve të SKV-së dhe Vetëvendosjes iu vazhdua paraburgimi.

“Arrestimi i pakuptimtë i tyre, e sidomos mbajtja kaq e gjatë në paraburgim, e ka pamundësuar aktivizmin e këtyre studentëve mu në prag të zgjedhjeve studentore në Universitetin e Prishtinës që do të mbahen në datën 15 maj”, vijoi Kurti postimin e tij.

Aktivistët e Organizatës Studentore për Barazi- Studim, Veprim, Kritikë, u arrestuan më 13 prill, natën kur po festonin tetëvjetorin e themelimit.

Policia tha se kishte gjetur gjëra të paligjshme në Parkun e Prishtinës ku po festohej themelimi i SKV-së, ndërsa aktivistë të kësaj organizate studentore mohuan pretendimet e policisë.

http://kallxo.com/gjykata-vendos-per-gjashte-te-arrestuarit-e-skv-se/

KALLXO.com shkroi për vazhdimin e paraburgimit ndaj aktivistëve të SKV-së.