Kryetari i Lëvizjes Vetëvendosje, Albin Kurti - Foto: KALLXO.com

Kurti ia kujton Thaçit letrën që ia dërgoi Trumpit para katër muajve

Kryetari i Lëvizjes Vetëvendosje, Albin Kurti ia ka kushtuar një postim në “Facebook” letrës së Presidentit Thaçi dërguar Presidentit Donald Trump para katër muajve.

Sipas liderit të Vetëvendosjes, Thaçi e sabotoi vetveten.

“Si e sabotoi Presidenti vetveten. Katër muaj u bënë sot nga letra të cilën Presidenti i Kosovës ia dërgoi Presidentit të ShBA-ve, z. Donald Trump. Paragrafi 3 ishte interesant aty, andaj le ta përkujtojmë: “Më lejoni t’ju siguroj personalisht se si President i Kosovës unë do të jem i gatshëm dhe i vullnetshëm të bëj kompromiset e nevojshme për të arritur një marrëveshje gjithëpërfshirëse dhe të balancuar…”, ka shkruar Kurti në “Facebook”.

Sipas të parit të Lëvizjes Vetëvendosje, gatishmëria e Thaçit për marrëveshje me Serbinë është pazar i tij personal.

“Pra, edhe i gatshëm edhe i vullnetshëm për kompromiset e nevojshme! Jo vetëm i gatshëm, por edhe i vullnetshëm. Jo ndonjë kompromis, por kompromiset e nevojshme. Me këso gatishmërie e dëshire nuk mund të ketë dialog e marrëveshje, por veçse pazar (personal) për kapitullim (shteti). Kur je tepër fleksibil karshi Serbisë, kjo tashmë nuk paraqet më fleksibilitet, por nënshtrim e dorëzim. Rrjedhimisht, nuk mund të ketë dialog me këso gatishmërie e vullneti paraprak për kompromiset e nevojshme”, deklaroi ai.

Kurti thotë se Presidenti i Kosovës e sabotoi vetveten sepse u servilua para Serbisë.

“Dialog nuk mund të bëjnë ekstremistët. Dhe, ekstremist nuk është vetëm ai që a priori nuk do dialog, por edhe ai që a priori do marrëveshje. Pra, ekstremist është pikërisht ai që pranon gjithçka duke kërcyer te ujdia pa negociata fare. Me këtë ekstremizmin e tij, Presidenti i Kosovës sabotoi vetveten. Sepse me servilizëm kaq të sforcuar s’mund t’i pëlqesh dot askujt”, thotë ai.

Në fund, Kurti ia përmendi edhe bashkimin e Luginës me Kosovën. Ai tha të ketë dëgjuar Presidentin të flet për këtë temë në Prishtinë por nuk e kishte parë që t’ia thoshte në letrën e dërguar Presidentit Amerikan.

“Megjithkëtë Presidenti ka dashur të na e bashkojë Luginën me Kosovën? E kam dëgjuar në konferenca shtypi në Prishtinë, nuk e pashë në këtë letrën e 8 janarit që ia nisi Presidentit Trump në Ëashington D.C”, thuhet në fund të postimit të tij.