Egjipt, gjendet mumje e mbuluar me ar, sarkofag i pa hapur për 4300 vjet

Mumja, mbetjet e një njeriu të quajtur Hekashepes, konsiderohet si një nga mbetjet më të vjetra dhe më të plota jo mbretërore të zbuluara ndonjëherë në Egjipt.

Ai u zbulua në një bosht 15 metra të thellë në një varrezë antike në jug të Kajros, në Saqqara, ku u gjetën tri varre të tjera.

Një varr i përkiste “ruajtësit të sekretit”.

Më e madhja nga mumiet e zbuluara në varrezat e lashta thuhej se ishte një burrë i quajtur Khnumdjedef – një prift, inspektor dhe mbikëqyrës i fisnikëve.

Tjetri ishte një mashkull me emrin Meri – një zyrtar i lartë i pallatit, të cilit iu dha titulli “ruajtës i sekretit”, gjë që e lejonte të kryente rituale të veçanta fetare.

Një gjykatës dhe shkrimtar i quajtur Fetek besohet se është varrosur në një varr tjetër, ku u zbulua një koleksion i asaj që besohet të jetë statuja më e madhe e gjetur ndonjëherë në zonë.

Midis varreve u gjetën edhe disa objekte të tjera, duke përfshirë qeramika.

Arkeologu Zahi Hawass, ish-ministri i antikiteteve i Egjiptit, tha se të gjitha gjetjet datojnë nga shekulli 25 deri në 22 para Krishtit.

Ky zbulim është kaq i rëndësishëm sepse i lidh mbretërit me njerëzit që jetojnë rreth tyre, thotë Ali Abu Deshish, një tjetër arkeolog që mori pjesë në gërmime.

Saqqara ka qenë një varrezë aktive për më shumë se 3000 vjet dhe është shpallur një lokacion i Trashëgimisë Botërore të UNESCO-s. Ndodhet në kryeqytetin e lashtë egjiptian të Memfisit dhe është shtëpia e më shumë se dymbëdhjetë piramidave – duke përfshirë Piramidën e Hapit, afër vendit ku u gjet boshti i mumjes.

Zbulimi i së enjtes vjen vetëm një ditë pasi ekspertët në qytetin jugor egjiptian të Luxor thanë se kishin zbuluar një qytet të plotë të epokës romake, që daton në shekullin e dytë dhe të tretë të erës sonë.

Arkeologët gjetën ndërtesa banimi, kulla dhe ato që ata i quajtën “punishte metalike” – me enë, mjete dhe monedha romake.

Egjipti ka bërë shumë zbulime të mëdha arkeologjike në vitet e fundit si pjesë e përpjekjeve për të ringjallur industrinë e tij të turizmit./Dnevnik.hr

Përgatiti: Nuhi SHALA