Pamje nga ekspozita ‘Nga pluhuri i arkivave...’. Foto: Facebook/Uran Haxha
Uran Haxha hap ekspozitën me artikuj të shtypit për qytetin e Suharekës
Gazetari Uran Haxha ka hapur sot ekspozitën e tij personale, “Nga pluhuri i arkivave…” në Muzeun e Qytetit në Suharekë.
Ekspozita përmban artikuj shtypi të shkruar për qytetin e Suharekës, gjatë viteve të ‘60-ta të shekullit të kaluar.
Në një postim në Facebook, Haxha ka shkruar se ekspozita prezanton momente me rëndësi për qytetin e Suharekës, zhvillimet ekonomike, arsmore, kulturore, etj, gjatë viteve të ‘60-ta.
“Ekspozita mban emrin ‘Nga pluhuri i arkivave…’ dhe pikërisht nga pluhuri i arkivave kam tentuar të nxjerrë rrëfimet, fotografitë dhe realitetin e atyre viteve për qytetin tim”, ka shkruar Haxha.
Ndërkaq, kryetari i Komunës së Suharekës, Bali Muharremaj, i cili mori pjesë në hapje të ekspozitës, ka shkruar në Facebook se ekspozita sjell fakte interesante për qytetin e tij.
“Gazetari Uran Haxha na ka sjell disa prej artikujve më interesantë për Suharekën e viteve të ’60-ta të gazetës ‘Rilindja’. Sot kuptova se kush kishte qenë rekordmen ndër bujqit e Nëpërbishtit, kush kishte vënë themelin e fabrikës së Ballkanit dhe shumë fakte interesante për Suharekën”, ka shkruar Muharremaj në Facebook.
Ekspozita “Nga pluhuri i arkivave…” do të jetë rezidente në Muzeun e Qytetit dhe e hapur për publikun.