Telegram ngushëllimi i ministres Dumoshi për vdekjen e aktorit Rikard Ljarja

Ministrja e Kulturës, Rinisë dhe Sportit e Kosovës, Vlora Dumoshi përmes një telegrami ka ngushëlluar familjen Ljarja, por edhe gjithë komunitetin kulturor për humbjen e aktorit Rikard Ljarja.

Përmes këtij telegrami, ministrja Dumoshi ka pohuar se puna, kontributi dhe angazhimi i aktorit Ljarja në fushën e teatrit dhe sidomos të kinematografisë, e ka bërë atë figurë të rëndësishme në historinë e kulturës shqiptare.

“Ne në Kosovë, jemi ushqyer me kulturën shqiptare nëpërmjet veprave të cilat na ka sjellë Rikardi bashkë me shumë aktorë e artistë tjerë shqiptarë. Jemi rritur me filmat ku protagonist ka qenë ai. Nga shumë filmat që Rikardi mori pjesë, nuk mund të harrohen dot “Rrugët e bardha”, “Pesha e kohës”, e shumë filma të tjerë si dhe angazhimi i tij në teatrin “Migjeni” i cili ishte një thesar në mesin e xhevahireve të tjerë që kishte Shkodra”, ka potencuar Dumoshi.

Dumoshi ka thënë se vdekja e tij është humbje e madhe për artin shqiptar, por korpusi i veprave filmike që ai la pas vete, janë një pasuri e çmuar artistike që ka vulën e kulturës shqiptare dhe bën që emri i tij të mos harrohet kurrë.

Aktroi Rikard Lajrja ka vdekur dje në Tiranë në moshën 77 vjeçare.