'PriFest’ shpalos programin kryesor garues
Festivali Ndërkombëtar i Filmit në Prishtinë, “PriFest”, ka shpalosur programin kryesor garues të edicionit të sivjetmë të këtij festivali.
Edicioni i 13-të i “PriFest” do të mbahet nga 24 deri më 29 gusht 2021 në Prishtinë.
Kategoria e filmave Ballkanik të metrazhit të gjatë, e quajtur në të kaluarën edhe “Filmat e mjaltës dhe gjakut”, përbëhet nga 7 filma nga 5 shtete.
Njëri nga ta do ta ketë premierën ndërkombëtare, 2 filma do të kenë premierën regjionale dhe të gjithë filmat do të jenë premierë në Kosovë.
Në mes 7 filmave, do të jetë edhe filmi që hap festivalin, fituesi i trefishtë i Sundance IFF, “ Zgjoi’ i regjisores Blerta Basholli.
Pjesë e këtij programi garuese është edhe filmi “Luaneshat e kodrës”, filmi debutant i Luana Bajramit, që para pak kohe pati premierën në Kanë (Cannes), në seksionin “Director’s Fortnight’.
Në listë është edhe filmi “Pas dimrit” nga Ivan Bakraç i cili ishte pjesëmarrës në “PriFORUM”, platformën e industrisë filmike të “PriFest”, në vitin 2016.
Pjesë e këtij programi janë edhe, filmi turk “Druri i heshtur” nga Faysal Soysal, filmi boshnjak “Hëna e plotë”.
Një tjetër film i Kosovës në listën e filmave garues është “Andromeda Galaxy” nga More Raça.
Përfaqësuesi i Shqipërisë në garë e sivjetme të programit ballkanik të “PriFest” do të jetë filmi “Bolero në shtëpinë e pleqve” i Spartak Peçanit.
“Jemi shumë të lumtur për programin garues të këtij edicioni. Është një moment unik për festivalin tonë, sepse do të kemi 3 filma kosovarë në programin kryesor garues. Natyrisht, ata janë aty jo sepse janë të Kosovës, por sepse janë kualitativ. Jam poashtu i lumtur që do të kemi shumë regjisorë e regjisore të reja në garë. Nga 7 filmat garues, 5 janë regjisorë debutantë. Dhe mbi gjitha, jemi të lumtur që janë 3 regjisore femra në garë”, thuhet në njoftim.
Lista e plotë e programit garues të filmave ballkanik:
- “Luaneshat e kodrës” nga Luana Bajrami,
Kosovë/Francë, 83m.
- “Hëna e plotë” nga Nermin Hamzagiç,
Bosnja dhe Hercegovina, 85 min.
- “Druri i heshtur” nga Faysal Soysal,
Turqi/Iran, 118 min.
- “Pas dimrit” nga Ivan Bakraç,
Mali i Zi, 101 min.
- “Bolero në shtëpinë e pleqve” nga Spartak Pecani,
Shqipëri/Kosovë, 108 min.
- “Andromeda galaxy” nga More Raça,
Kosovë/Spanjë/Itali/Maqedoni e Veriut, 80 min.
- “Zgjoi” nga Blerta Basholli,
Kosovë/Zvicërr/Shqipëri/Maqedoni e Veriut, 84 min.