Në Ferizaj jepet sot me publik shfaqja 'Kontrolli dhe makina e dashurisë’
Teatri “Adriana Abdullahu” i Qytetit të Ferizajt planifikon të shfaqë sot në mbrëmje, shfaqjen “Kontrolli dhe makina e dashurisë”, me tekst dhe regji të Besim Ugzmajlit.
Shfaqja, sipas menaxhmentit të Teatrit “Adriana”, jepet sot në ora 18:00 me zbatim strikt të rregullave të reja të institucioneve për shkak të COVID-19, me numër të kufizuar të publikut, bartje maskash dhe mbajtje të distancës.
Fatmir Hyseni, drejtor i Teatrit “Adriana” ka konfirmuar për KALLXO.com se premiera me publik e shfaqjes “Kontrolli dhe makina e dashurisë” planifikohet të jepet sot dhe nesër në ora 18:00, duke respektuar vendimet e institucioneve për parandalimin e coronavirusit.
“Do të ketë publik vetëm 50 veta, të gjithë do të kenë maska dhe duke respektuar distancën. Repriza do të jetën nesër më 9 korrik”, ka thënë për KALLXO.com, drejtori Hyseni.
Hyseni ka thënë se puna e bërë për realizmin e kësaj shfaqje duhet të prezantohet, duke pasur parasysh sfidat dhe vështirësitë që ka krijuar COVID-19.
Ndërsa, regjisori i shfaqjes Besim Ugzmajli ka thënë se përgatitja e shfaqjes ka kaluar nëpër një proces mjaft sfidues
“Ne kemi filluar këtë shfaqje vitin e kaluar për të vazhduar në muajt e parë të këtij viti, pastaj ndodhi pandemia dhe gjithçka ndryshoi. Sigurisht që ka qenë proces mjaft i vështirë dhe i pazakonshëm, për shkak edhe të gjendjes psikologjike të të gjithë aktorëve dhe ekipit. Mirëpo ia kemi dalë dhe tani e përfunduam shfaqjen si të tillë”, tha Ugzmajli.
Premiera e mbyllu e shfaqjes “Kontrolli dhe makina e dashurisë” ishte dhënë në mes të muajit qershor në Teatrin “Adriana”.
Shfaqja “Kontrolli dhe makina e dashurisë”, sjell dilema ekzistenciale të vendosura në hapësirë distopike. Kjo dramë edhe pse e vendosur në një ambient dhe atmosferë distopike, mëton të ndërtohet mbi strukturën klasike të dramës në përgjithësi.
Në shfaqje Luajnë: Mevlan Saraçi, Uratë Shabani, Valdrin Osmani, Blin Sylejmani, Dardanë Mehmeti, Gresë Gashi, Sherif Bega, Milot Salihu, Jajush Ramadani, Kushtrim Emërllahu, Leonora Hasani, Kushtrim Ugzmajli.