Mali i Zi dhe Maqedonia e Veriut tërhiqen nga Eurovizioni i vitit të ardhshëm

Mali i Zi dhe Maqedonia e Veriut nuk do të konkurrojnë në Eurovizionin e vitit të ardhshëm si shkak i kostos që u duhet të paguajnë për pjesëmarrje.

Transmetuesit paguajnë tarifë për të marrë pjesë në garë, por shuma ndryshon në varësi të madhësisë së vendit.

BBC News ka kuptuar se disa vendeve u është kërkuar të paguajnë më shumë pasi Rusisë i’u ndalua pjesëmarrja.

Rusia, si kontribues i madh financiar, u përjashtua nga konkursi i këtij viti për shkak të pushtimit të Ukrainës.

“Përveç kostove të konsiderueshme të tarifave të regjistrimit, si dhe kostos së qëndrimit në Britaninë e Madhe – ne u përballëm edhe me mungesë interesi nga sponsorët, ndaj vendosëm t’i drejtojmë burimet ekzistuese për financimin e projekteve kombëtare aktuale dhe të planifikuara”- tha transmetuesi publik i Malit të Zi RTCG.

Kostoja totale për të gjithë transmetuesit e përfshirë për të hyrë zakonisht shkon mbi 5 milionë euro, por saktësisht se sa paguan secili pjesëmarrës nuk bëhet publike.

Kuptohet gjithashtu se disa vende të tjera po ashtu, po konsiderojnë të tërhiqen si rezultat i kostos shtesë.

Mes 8 dhe 17 milionë funta pritet të paguaj  BBC për të organizuar eventin, në emër të Ukrainës, në Liverpool në maj 2023.

MRT në një deklaratë tha se “rritja e tarifës së regjistrimit për pjesëmarrje”, si dhe kriza energjetike në Maqedoninë e Veriut i detyroi të marrin këtë vendimi.

Organizatorët e konkursit të këngës – EBU – thanë se “janë të përkushtuar të mbajnë kostot e pjesëmarrjes sa më të përballueshme” dhe tarifat e saj “llogariten bazuar në numrin e vendeve që konkurrojnë duke marrë parasysh madhësinë relative të anëtarit dhe statusin financiar “.

Lista e plotë e vendeve që shkojnë në Merseyside në 2023 pritet të konfirmohet më vonë këtë javë.