Ministrja Vlora Dumoshi takon pjesëtarë të komunitet boshnjak

Ministrja e Kulturës, Rinisë dhe Sportit, Vlora Dumoshi, ka zhvilluar sot një takim me përfaqësues të komunitetit boshnjak të kryesuar nga Rasim Demiri, përfaqësues i koalicionit “Vakat” dhe deputet në Kuvendin e Kosovës.

MKRS-së, përmes një komunikate për media ka bërë të ditur se qëllimi i takimit ishte mbështetja e MKRS-së për komunitetin boshnjak në Prizren e Dragash dhe për kërkesat dhe problemet që ballafaqohet ky komunitet në fushat që mbulon ministria.

“Deputeti Demiri tha se shumë vendbanime të komunitetit boshnjak të këtyre dy komunave kanë mungesë të theksuar të infrastrukturës fizike kulturore e sportive. Ka fshatra ku banojnë komuniteti boshnjak që nuk kanë shtëpi të kulturës e terrene sportive dhe kërkoi nga ministrja Dumoshi që MKRS-ja të mbështesë financimin e projekteve që bëjnë të mundur këtë gjë”, thuhet në komunikatë.

Demiri, po sipas komunikatës ka pohuar gjatë takimit se shoqëritë kulturore dhe të rinjtë e komunitetit boshnjak janë shumë aktiv dhe mbështetja që u ofrohet nga niveli lokal është i pamjaftueshëm andaj kërkojnë nga niveli qendror një mbështetje më të madhe.

Në anën tjetër ministrja Dumoshi ka thënë se MKRS-ja ka nënshkruar disa memorandume me Komunën e Prizrenit të cilat ua mundësojnë komunitetit boshnjak një mbështetje të MKRS-së.

“Ministria e mbështet komunitetin boshnjak si një investime në projekte kapitale por edhe nëpërmjet subvencioneve. Për kërkesat që keni për fshatrat që të mbështeten më shumë, do të shikojmë bashkërisht mundësitë që për vitin e ardhshëm të planifikohet dhe të realizohet në gjë e këtillë. Dera e ministrisë është e hapur për komunitetin boshnjak”, ka thënë Dumoshi, citon komunikata.

Dumoshi ka premtuar para të ftuarve se shumë shpejtë do të vizitojë këtë komunitet në Prizren e Dragash.