Ministria e Kulturës premton plan emergjent kundër COVID-19

Ministria e Kulturës, Rinisë dhe Sportit do të themelojë një grup punues për hartimin e Planit Emergjent për Kulturë, Rini dhe Sport, i cili do të përfshijë masat e nevojshme për të ndihmuar dhe mbështetur sektorët që i mbulon MKRS-ja, për ballafaqim me vështirësitë e krijuara nga efekti i pandemisë globale CoVid-19.

MKRS përmes një njoftimi për media, MKRs-ja ka bërë të ditur se fokusi i punës së këtij grupi do jetë në ngritjen e programeve të reja për subvencionim të krijuesve, të rinjve dhe sportistëve individualë si dhe OJQ-ve dhe bizneseve në këta sektorë të cilat kanë nevojë për mbështetje, me qëllim të vijimësisë së punës.

“Grupi i punës do t’i propozojë ministrit kriteret e reja për përfitim të fondeve konform pakos emergjente pas Masave të Qeverisë së Republikës së Kosovës që kanë goditur rëndë edhe aktivitetet sportive, kulturore dhe artistike. Sipas pakos, për të ndihmuar këto kategori, do të rritet për 5 milionë euro buxheti i Ministrisë së Kulturës, Rinisë dhe Sportit, shumë kjo që do të përdoret për subvencionim shtesë të shoqatave sportive e kulturore të vendit”, thuhet në komunikatën e MKRS-ë.

Po sipas komunikatës me caktimin e grantit prej 5 milion euro dedikuar për MKRS-në, ministrja Dumoshi menjëherë ka ndërmarrë veprimet e duhura për themelimin e grupit punues për të ndihmuar sektorët e kulturës, rinisë, sportit e trashëgimisë.