Memorandum teatror për organizimin e festivalit ‘Kosovo Theater Showcase 2019'

Teatri Kombëtar i Kosovës, Teatri “Adriana” nga Ferizaj, Teatri i Gjilanit dhe Qendra Multimedia nga Prishtina kanë nënshkruar të martën një memorandum bashkëpunimi, me të cilin zotohen të angazhohen bashkërisht në organizimin e edicionit të sivjetmë të “Kosovo Theater Showcase 2019”, që sivjet do të mbahet nga data 31 tetor deri me 4 nëntor 2019.

Qendra Multimedia e Prishtinës përmes një njoftimi për media, njofton se në këtë edicion pritet të prezantohen së paku 6 shfaqje të prodhuara nga teatrot nënshkruese të këtij memorandumi.

Edicioni i sivjetshëm i showcase-it 2019 pritet të sjellë në Kosovë rreth 50 kritik teatri, gazetarë, selektorë festivalesh e admirues të teatrit nga vende të ndryshme të botës.

“Përveç Prishtinës, showcase do të zhvillohet edhe në qytete tjera të Kosovës. Në këtë mënyrë, mysafirët ndërkombëtarë do të kenë mundësi të rrallë për të parë jo vetëm tendencat më të fundit të skenës së teatrit të Kosovës, por edhe të shijojnë mikpritjen e madhe dhe peizazhin e bukur të Kosovës. Ky edicion gjithashtu do të sjellë disa programe plotësuese; diskutime, panele dhe mbrëmje muzikore”, thuhet në njoftimin e Qendrës Multimedia.

“Kosovo Theater Showcase 2019” është pjesë e platforma kulturore “Platforma Kulturore e Kosovës 2019 +”.