Komuna e Prishtinës
Komuna e Prishtinës prononcohet pas pezullimit të vendimit për renovimin e Hamamit të Madh
Komuna e Prishtinës ka mohuar se anulimi i vendimit të Institutit të Kosovës për Mbrojtjen e Monumenteve për restaurimin e Hamamit të Madh të Prishtinës, është bërë për shkak të emrit.
Adrian Berisha, drejtor për Kulturë në Komunën e Prishtinës, ka thënë se arsyet për vendimin për anulim janë disa problemeve të tjera në projekt.
“Komuna e Prishtinës ju njofton që projekti i Agjencisë Turke për Bashkëpunim dhe Koordinim (TIKA) sa i përket restaurimin e Hamamit të Madh në Prishtinë nuk është anuluar, mirëpo është anuluar vendimi i Institutit të Kosovës për Mbrojtjen e Monumenteve nga komisioni i Ankesave në IKMM. Anulimi i vendimit nuk vjen si pasojë e emrit të Hamamit të Madh të Prishtinës, siç po shkruhet në disa media, por shkaku i disa problemeve të tjera në projekt, si: paramasa, plani dinamik, etj.”, ka thënë për KALLXO.com
Ndërsa e ka akuzuar Ministrinë e Kulturës, Rinisë dhe Sportit për mos qartësi rreh vendimit për anulim.
“Ju njoftojmë që, Këshilltari për Media i Ministrit të Kulturës, Rinisë dhe Sportit ka deklaruar për media që projekti është pezulluar. Ndërsa, Komisioni i Ministrisë së Kulturës deklaron se është anuluar vendimi i IKMM, që nënkupton se projekti është hedhur poshtë. Pezullim do të thotë që projekti mund të rishikohet dhe të plotësohet, përderisa në vendim të komisionit kjo nuk shkruhet. Andaj, Komuna e Prishtinës kërkon sqarim të menjëhershëm rreth këtyre deklaratave që janë në kundërshtim me njëra-tjetrën e për të cilat vendime Komuna e Prishtinës nuk është njoftuar paraprakisht, por lajmin e ka kuptuar nga mediat. Fakti që qytetarët po dezinformohen dhe mediat informohen para institucionit për një vendim të tillë është shqetësues”, ka thënë drejtori Berisha për KALLXO.com.
Në anë tjetër zyrtarë të MKRS kanë thënë për KALLXO.com se pasur një ngatërrim të fjalëve dhe se të mërkurën komuna është njoftuar për anulimin.
“Komisioni i Shqyrtimit të Ankesave pranë Ministrisë së Kulturës e ka anuluar Vendimin e IKMM-së për renovimin e Hamamit të Madh. Është ngatërruar fjala anulim me pezullim, dhe anulim i vendimit me pezullim të projektit. Dje IKMM-ja e ka njoftuar Komunën e Prishtinës lidhur me këtë anulim”, ka thënë për KALLXO.com, Qerim Ondozi, këshilltar i ministrit të Kulturës.
Ministria e Kulturës tregon arsyet e anulimit të vendimit për restaurimin e Hamamit të Madh