Këtë javë nis festivali 'Etno Fest 2024'

Me temën “Lumturia” më 10.08.2024, do të nisë edicioni i 14-të i Festivalit të Arteve dhe Kulturës Tradicionale “Etno Fest”.

Shfaqje muzikore, teatrore, orë poetike e performanca etnokulturore do të karakterizojnë 11 shtyllat e programit të edicionin e sivjetmë të festivalit.

“Etno Fest” – sipas organizatorëve synon gjetjen, ruajtjen dhe promovimin e vlerave të qëndrueshme të arteve dhe kulturës tradicionale duke i ofruar ato si lënde frymëzimi për artet kontemporane.

“Ky festival ka bindjen se një art dhe një kulturë me identitet autokton mund të bëhet konkurruese në relacion me kulturat tjera rreth nesh dhe mund t`i përballojë ndeshjeve me megakulturat e fuqishme që rrezikojnë e kulturave të popujve të vegjël”- thuhet në njoftimin e “Etno Fest”-it.

Organizatorët kanë bërë të ditur se gjatë këtij edicioni do të organizojnë edhe punëtorinë 10-ditore “Laboratori për sistemin e Grotovskit”që do të mbahet nga artisti Italian Mario Biagini.

Festivali mbahet në fshatin Kukaj të Prishtinës.

Për të lehtësuar pjesëmarrje e qytetarëve në “Etno Fest”, nga fillimi deri në fund, organizatorët kanë siguruar një linjë autobusi për vajtje-ardhje në Kukaj.

Hyrja për në festival do të jetë falas.

“Etno Fest” do të zgjasë deri më 18.08.2024.