Fituesit e Festivalit Mbarëkombëtar të Këngës Popullore
Ansambli “Bajram Shabani” nga Kumanova ka marrë çmimin e parë në edicionin e parë të Festivalit Mbarëkombëtar të Këngës Popullore që u mbajt dje në Rahovec me moton “N’konak të Rahovecit bashkon kënga shqipe”.
Çmimin e dytë e ndanë ansambli “Agimi” nga Prizreni dhe ansambli “Presheva” i Preshevës. Kurse çmimi i tretë i Festivali i takoi ansamblit nikoqir, “Artistët rahovecas”.
Përveç këtyre çmimeve, juria e Festivalit Mbarëkombëtar të Këngës Popullore ndau edhe “Çmimin e publikut” që e mori Ardian Limanmera.
Çmimi “Paraqitja më e mirë skenike” shkoi për këngëtaren Viola Rrustemi. Çmimi “Solisti më i mirë” i takoi Shkëlqim Bytyçit nga ansambli “Agimi” Prizren. Po për ansamblin “Agimi’ shkoi edhe çmimi ‘Solistja më e mirë’, që e mori Erina Ajeti.
Çmimin ‘Dueti më i mirë’, e mori dueti Nuredin Fetahu -Qerim Hamidi nga ansambli “Bajram Shabani’ nga Kumanova. Ky ansambël mori edhe çmimin ‘Orkestra më e kompletuar’.
Edicioni i parë i Festivalit Mbarëkombëtari i Këngës Popullore është mbajtur dje në Shtëpinë e Kulturës “Mensur Zyberaj” në Rahovec.
Pjesë e këtij edicioni ishin ansamble dhe këngëtarë të muzikës popullore nga disa qytete të Kosovës, Preshevës dhe nga Kumanova.