Ditët e kitarës në Mitrovicë nisin nesër me koncertin e spanjolles Montesinos

Edicioni i 6-të i festivalit “Mitrovica Guitar Days”- MGD (Ditët e kitarës në Mitrovicë) nis nesër, e premte, më 06.09.2024 në Mitrovicë të Jugut.

Ky edicion i festivalit hapet me koncertin e kitaristes spanjolle, Anabel Montesinos, e cila konsiderohet ndër më të mirat në botë dhe mbahet në muzeun e këtij qyteti, duke filluar nga ora 19:30.

Kitaristi Erhan Mujka, themelues dhe bashkorganizatori i festivalit, bëri të ditur për KALLXO.com se gjatë Ditëve të kitarës në Mitrovicë, do të organizohen 4 koncerte të cilat mbahen në Muzeun e Qytetit të Mitrovicës së Jugut dhe fillojnë në ora 19:30.

Ai tha se përveç koncerteve, gjatë këtij festivali do të mbahen edhe një seri masterklasash për kitarë dhe violinë.

Mujka ka thënë se pas koncertit hapës të kitaristes spanjolle, Montesino, me 8-të shtator do të mbahet koncerti i dytë, me duetin Moeko Sugiura- Japoni, dhe Nejc Kuhar – Slloveni, që njihen si “Eminent Duo”.

Ndërkaq, më 10-të shtator do të mbahet koncerti i duos, A&Z Duo.

“Koncerti i 10-të shtatorit do të jetë ‘flakë’, me të vërtetë, ku do të luajnë A&Z Duo, Aniello Desiderio dhe Zoran Dukiq, që një koncert i tillë është i rrallë edhe në Europë, duke pasur në konsideratë se këta dy kitaristë, janë emrat më të mëdhenj të kitarës në botë”- tha Mujka, për KALLXO.com. Sipas tij, nëse figurativisht tërhiqet një paralele, këta dy konsiderohen Pele dhe Maradona për kitarë.

Përveç koncerteve, ka vazhduar më tej Mujka, gjatë edicionit të 6-të të MGD do të mbahen edhe masterklasat me të gjithë artistët e ftuar në këtë festival, përfshirë edhe masterklasat në violinë.

“Festivali MGD, është një festival shumë i veçantë, dhe i strukturuar në atë mënyrë që është tepër unik. Gjithashtu, duke pasur parasysh emrat të cilët i sjellim në Mitrovicë, festivali, sa i përket nivelit është shumë konkurues  jo vetëm në Kosove (pasi që është unik), por edhe në rajon, gjë për të cilën jemi shumë krenar”- ka thënë Mujka.

Edicioni i 6-rë i MGD mbyllet më 11 shtator 2024, me koncertin e nxënësve dhe studentëve pjesëmarrës në masterklasat e MGD.