Botohet Monografia për mësuesin veteran të Komunës së Podujevës

Është botuar libri kushtuar mësuesit veteran të Komunës së Podujevës “Mulla Hashim Kuleta: Pishtar i arsimit në Llap”, me autor Refik Gërbeshin.

Libri ofron të dhëna dokumentare e historike për kontributin që ka dhënë Hashim Kuleta për arsimin shqip në Kosovë pas Luftës së Dytë Botëror (LDB).

Kuleta bën pjesë në mesin e shumë klerikëve fetar të cilët ndihmuan në çrrënjosjen e analfabetizmit dhe arsimimin e shqiptarëve, veçmas nga viti 1945 e këndej.  Shumë prej të cilëve iu përkushtuan Shkollës shqipe me sugjerimin dhe ndihmën e Mehmet Gjevorit, ndër kontribuuesit kyç për zhvillimin e arsimit shqip pas LDB-së.

Dëshmi të tilla janë evidentuar edhe në Monografinë e Gërbeshit për Kuletën. Mësuesi Kuleta fillimisht nga 1945 dha mësim në Tërnac, Halabak, Batllavë e Dyz.

Sipas Refik Gërbeshit, autori i Monografisë, mësuesi Hashim Kuleta përveç profesionit të mësuesit një kohë sherbeu edhe si inspektor arsimi për Shkollat e Komunës së Podujevës – duke dhënë një kontribut për përmirësimin e cilësisë në arsimin kosovar.

“Ishte mësuesi i parë i Shkollës shqipe në ish-Mejtepin në Tërnavë e në Halabak dhe gjetkë. Ka punuar me klasë të kombinuara dhe me shumë nxënës, ndërsa në mbrëmje me të rritur analfabetë në vitin 1946.” – ka shkruar ndër të tjera Gërbeshi për Kuletën.

Libri “Mulla Hashim Kuleta: Pishtar i arsimit në Llap”, me autor Refik Gërbeshin është promovuar më 7 mars 2025, në Podujevë.