Video e fabrikuar e presidentes Vjosa Osmani- Sadriu

Presidentja e kallë me vallëzim për festën e Pavarësisë

Faqja në Facebook ‘Gazetavip.com’ (arkiva 1, 2 dhe 3) ka publikuar një video të një vajze duke vallëzuar me përshkrim “Presidentja e kallë me vallëzim për festën e Pavarësisë”.

Kjo video ka marrë 108 mijë shikime. Vajza që vallëzon në këtë video ka fytyrën e presidentes së Republikës, Vjosa Osmani-Sadriu.

Krypometri përmes kërkimit të fotografive në “Google Lens” e ka gjetur videon origjinale, e në të cilën nuk është presidentja Vjosa Osmani-Sadriu duke vallëzuar.

Video origjinale është edituar duke përdorë Inteligjencën Artificiale, pasi dallohet ndryshimi i tipareve të fytyrës, duke e bërë t’i ngjajë presidentës së Kosovës, Vjosa Osmani-Sadriut.

Videot e krijuara ose që kanë ndërhyrje me Inteligjencë Artificiale mund të vërehen në lëvizje dhe shprehje të fytytrës, sinkronizim të zërit, sfond, etj..

Krypometër ka analizuar videon e publikuar nga faqja Gazetavip.com. Video ka disa defekte. Në një moment kur valltarja është në profil i ndërrohet fytyra dhe del vajza që është duke vallëzuar në videon reale. 

Në dy momente të tjera fytyra deformohet, sidomos në rastet kur e njëjta ka lëvizje të shpejtë të kokës. 

 

Krypometër ka kontaktuar me kabinetin e presidentes së Republikës së Kosovës, Vjosa Osmani-Sadriu. Egnesa Vitia, këshilltare e Presidentes, ka thënë se Presidentja nuk ka qenë në këtë dasëm dhe se video është e manipuluar.

“Kjo video është e montuar me AI, pra informata është totalisht e pasaktë se këtu është e përfshirë Presidentja”- ka thënë Vitia për Krypometër.