Skema e mashtrimit për shitje të produkteve të paverifikuara
Deklarata
Farmaceutiket e rrezikshëm në Kosovëa 2021. Si i vrasin farmacitë meshkujt me potencë të dobët duke fshehur të vërtetën
Vlerësimi
Rrenë e kryptë
Artikulli me titull “Farmaceutiket e rrezikshëm në Kosovëa 2021. Si i vrasin farmacitë meshkujt me potencë të dobët duke fshehur të vërtetën” është i rremë. Gjithë përmbatja e këtij artikulli është e fabrikuar me qëllim që të shitet një produkt i caktuar për 39 euro. Edhe gazetari i RTK-së, Bashkim Vishaj, ka thënë se figura e tij dhe grafikat e emisionit që ai drejton janë keqpërdorë dhe asnjëherë nuk ka debatur për një temë të tillë.
Artikulli
Më 9 dhjetor 2022 faqja e internetit “Lajme Shoqëria” ka publikuar përmbajtjen me titull: “Farmaceutiket e rrezikshëm në Kosovëa 2021. Si i vrasin farmacitë meshkujt me potencë të dobët duke fshehur të vërtetën”.
Ueb faqja në tekst ka pretenduar se disa farmaci po ju shesin burrave ilaçe të vjetra.
Ilustrimi i këtij lajmi është bërë me një fotografi të gazetarit të Radio Televizionit të Kosovës, Bashkim Vishaj, por në tekst nuk përmendet fare emri i tij.
Ndërkaq në përmbajtje janë edhe disa personazhe tjera që janë emërtuar si Valdrin Hako, Bashkim Vagaxhi dhe Erfan Kulla.
Lajmi i publikuar nga faqja Lajme Shoqëria është i rremë.
Gjithë artikulli është fabrikuar më qëllim që të shitet një produkt, i cili nuk është rekomanduar nga ndonjë burim kompetent mjekësor. Në fund të artikullit rekomandohet që lexuesi të marrë pjesë në një lojë që rezultatin e ka gjithnjë të njëjtë: ofron zbritje të produktit për 50%.
“Akoma mund të porosisësh Testoy, nxitoni! Testoy është rezervuar për ju. Keni 10 minuta kohë për të bërë kërkesën tuaj. Çmimi i ilaçit për ju do të jetë 39 EUROSH”- thuhet pas përfundimit të lojës.
KALLXO.com ka kontaktuar me gazetarin Bashkim Vishaj i cili ka konfirmuar se tërë përmbajtja është e rremë.
Vishaj ka thënë se përmbajtja dhe personazhet e përdorura në tekst janë të rremë.
“Këtu nuk përmendet fare emri im dhe nuk i njoh këta kush janë. Janë mundu me vjedh grafikën e emisionit”- është shprehur Vishaj.
Më tej, gazetari thekson edhe një herë se përmbajtja nuk është e vërtetë pasi temat të cilat ai i trajton në emisionet e tij kanë përmbajtje politike.
“100% është e rremë sepse unë merrem me debate politike. Goxha faqe e kanë shpërndarë por, nuk jam merrë me ta sepse përmbajtja është koti”- shton Vishaj.