Rrencat e liberalizimit të vizave
Deklarata
Ajo çka e kemi qëllim parësor është që në dhjetor (2018) qytetarët të lëvizin lirshëm
Vlerësimi
Rrenë e kryptë
Ka kaluar një vjet që kur Presidenti, Kryeparlamentari dhe kryeministri më tre zëvendësit e tij ia kanë uruar qytetarëve të Kosovës liberalizimin e vizave. Liberalizimi nuk ka ndodhur as gjatë këtij viti, ndërkohë që kryeministri ka dhënë edhe një premtim, të cilin KRYPOMETRI do të vazhdojë të monitorojë.
Artikulli
Saktësisht 1 vit më herët, 6 burrat e Kosovës kishin udhëtuar me aeroplanin privat të Behgjet Pacollit për në Bruksel.
Pas kësaj vizite, ashtu siç pritej, 18 korriku i vitit të kaluar kishte kaluar nën urimet e politikanëve për marrjen e liberalizimit të vizave për qytetarët e Kosovës.
Nga Brukseli, Komisionari i BE-së për Migrim, Çështje të Brendshme dhe Shtetësi, Dimitris Avramopoulos kishte deklaruar se Kosova i ka përmbushur të gjitha kriteret për liberalizim të vizave dhe se gjithçka do të varej nga Parlamenti dhe Këshilli i Evropës.
“Sot mund të konfirmojmë që Kosova ka përmbushur të gjitha kriteret për liberalizimin e vizave. Është tash në dorën e Parlamentit dhe Këshillit Evropian të vazhdojnë që të lëvizin përpara me propozimin tonë”, kishte thënë Avramopoulos, më 18 korrik të 2018.
Me t’i dëgjuar këto fjalë, 6 burrat e Kosovës, Hashim Thaçi, Kadri Veseli, Ramush Haradinaj, Behgjet Pacolli, Fatmir Limaj e Dardani Gashi nisen për në Prishtinë, ku ftojnë konferencë të jashtëzakonshme për media nga aeroporti “Adem Jashari”.
Ata nga aty, urojnë qytetarët për liberalizimin e vizave, duke thënë se brenda 2018, qytetarët e Kosovës do të lëvizin lirshëm.
“Sot është një ditë e madhe për Kosovën. Dua t’i falënderoj të gjithë për angazhimin e tyre dhe t’i uroj të gjithë qytetarët e Kosovës për këtë vendim të madh e meritor për vendin. Ne kemi besim të plotë se i tërë ky proces do të përmbyllet gjatë këtij viti”, kishte thënë Thaçi më 18 korrik të vitit të kaluar.
“Është lajm shumë i mirë, urime të gjithëve, e kemi merituar këtë lajm. Ajo çka e kemi qëllim parësor është që në dhjetor qytetarët të lëvizin lirshëm”, kishte thënë Veseli para mediave më 18 korrik të 2018.
2018 ka përfunduar, por jo edhe pritjet e qytetarëve të Kosovës për liberalizim të vizave.
Të 6 liderët kishin gënjyer kur kishin deklaruar se brenda vitit do të ketë liberalizim të vizave.
https://kallxo.com/thaci-rekomandimi-pozitiv-e-arritur-historike/
Ndërkohë, sot kryeministri i Kosovës sërish e ka dhënë një premtim për liberalizim të vizave kur është pyetur për deklarimet e bëra para një viti.
Haradinaj ka thënë se liberalizimi është më afër se sa që mendojmë. Ai ka thënë se lajmi për liberalizim është çështje javësh.
