Rrena se OSBE-ja i ka reaguar Serbisë
Deklarata
OSBE i reagon serbise pas ngjarjeve te fundit ne Veri
Vlerësimi
Pjesërisht e vërtetë
Titulli “OSBE i reagon serbise pas ngjarjeve te fundit ne Veri” nuk është mbështetur në faktet që janë pjesë e këtij artikulli. OSBE-ja nuk i ka reaguar Serbisë pas sulmeve ndaj gazetarëve në veri. Por, kjo organizatë e ka dënuar sulmin ndaj një ekipi të televizionit Klan Kosova në Zubin Potok, i ka cilësuar si të papranueshme sulmet ndaj profesionistëve të mediave që raportojnë për ngjarjet në veri të Kosovës
Artikulli
Më 26 dhjetor 2022 faqja e internetit web.news34posts.com ka publikuar një artikull me titull: “OSBE i reagon serbise pas ngjarjeve te fundit ne Veri”.
Ky artikull është shpërndarë edhe në Facebook nga faqja Hitshqipvideo më 27 dhjetor 2022 dhe nga Lajme Shqip – Nike më 27 dhjetor 2022.
Artikulli flet për reagimin e Organizatës për Siguri dhe Bashkëpunim në Evropë (OSBE) lidhur me sulmin ndaj një ekipi të televizionit Klan Kosova në veri të Kosovës.
Në artikull nuk është mbështetur me fakte konstatimi i bërë në titull se “OSBE i reagon serbise pas ngjarjeve te fundit ne Veri”.
Reagimi ndaj Serbisë nuk është shprehur as në postimin që e ka bërë faqja e Misionit të OSBE në Kosovë.
“Misioni i OSBE-së në Kosovë dënon ashpër sulmin e sotëm ndaj një ekipi të televizionit Klan Kosova në Zubin Potok. Ky është sulmi i katërt që nga fillimi i dhjetorit ndaj profesionistëve të mediave që raportojnë për ngjarjet në veri të Kosovës. Këto sulme janë të papranueshme dhe duhet të ndalen menjëherë. Siguria dhe siguria e gazetarëve në kryerjen e detyrave të tyre profesionale duhet të mbrohet në çdo kohë. U bëjmë thirrje të gjithëve që të përmbahen nga aktet e dhunës” – është reagimi i plotë i postuar nga OSBE.
Pra, përmes këtij shkrimi kjo organizatë e ka dënuar sulmin ndaj një ekipi të televizionit Klan Kosova në Zubin Potok, i ka cilësuar si të papranueshme sulmet ndaj profesionistëve të mediave që raportojnë për ngjarjet në veri të Kosovës dhe ka bërë thirrje që të gjithë të përmbahen nga aktet e dhunës, mirëpo në asnjërën pjesë të këtij reagimi nuk përmendet Serbia.