Rrena se është konfirmuar se 8 persona janë vrarë në Banjskë
Deklarata
Konfirmohet! 8 te vrare dhe nje i zene rob
Vlerësimi
Rrenë
Postimet “8 Terrorist te vrare deri tani nga policia e Kosoves” dhe “Konfirmohet! 8 te vrare dhe nje i zene rob” janë të rreme. Deri më tash, Policia e Kosovës nuk ka konfirmuar se janë vrarë 8 persona që ishin pjesë e grupit të armatosur që e kanë sulmuar një patrollë dhe vrarë një polic të Kosovës. Policia e Kosovës, më 24 shtator 2023 deri në ora 22:12 min, ka konfirmuar se tre persona nga grupi i armatosur janë vrarë dhe dy të tjerë janë plagosur.
Artikulli
Më 24 shtator 2023, faqja në Facebook-ut “Lajmi ne kohë” (arkiva) dhe “Gjakova Sot” (arkiva) kanë publikuar një fotografi me mbishkrimin “8 Terrorist te vrare deri tani nga policia e Kosoves” dhe “Konfirmohet! 8 te vrare dhe nje i zene rob”.
Ky informacion është shpërndarë më 24 shtator 2023 rreth orës 15:53.
Edhe pse në postim është thënë se është konfirmuar që 8 persona të grupit të armatosur janë vrarë, në postim nuk kanë dhënë asnjë citat nga Policia e Kosovës apo ndonjë burim tjetër kredibil.
Krypometri ka verifikuar se deri në orën 22:08 minuta nuk ka pasur asnjë konfirmim nga Policia e Kosovës se 8 persona janë vrarë.
Policia e Kosovës deri më tash ka konfirmuar se tre sulmues janë vrarë dhe gjashtë persona të tjerë janë arrestuar: dy persona të uniformuar e armatosur dhe katër të tjerë te të cilët janë gjetur radiolidhje e për të cilët dyshohet se kanë lidhje me grupin e armatosur.
Sipas Policisë, tre pjesëtarë të grupit të armatosur kanë mbetur të vdekur deri më tani në Banjskë të Zveçanit. Këtë e ka konfirmuar Policia e Kosovës përmes një njoftimi në Facebook.
Ndërsa është arrestuar edhe një pjesëtar tjetër i grupit terrorist.
Gjithashtu, presidenti i Serbisë, Aleksander Vuçiq, në një konferencë për media ka thënë se është konfirmuar që tre persona janë vrarë, dy nga snajperi dhe se dyshohet që edhe personi i katërt është vrarë.
“Konfirmohet se janë vrarë tre nga Kosova, dy nga snajperi me siguri, dy të plagosur rëndë dhe dyshohet se i katërti është vrarë. Kemi përcjellë e vëzhguar, përgjuar se çka ka bërë policia shqiptare, dëshmitë do t`i shihni ndoshta gjatë konferencës”- ka deklaruar Vuçiq më 23 shtator në konferencë për media që filloi nga ora 20:00.
Në Qendrën Klinike Universitare të Kosovës është duke u trajtuar njëri prej personave të plagosur në veri të vendit. I njëjti dyshohet së është pjesë e grupit terrorist, i arrestuar sot në veri të vendit.
Një pjesëtar i Policisë së Kosovës u vra sot në orët e para të mëngjesit nga një sulm i armatosur në fshatin Banjskë të Zveçanit. Po ashtu, si pasojë e këtij sulmi një polic mbeti i plagosur dhe një tjetër i lënduar.
