Rrena se edhe Kosova mund të udhëtojë në Arabinë Saudite pa viza 

“Lajm i mirë, nga sot shqiptarët do udhëtojnë pa viza edhe në këtë shtet!”

“Lajm i mirë, nga sot shqiptarët do udhëtojnë pa viza edhe në këtë shtet!”, është titulli i një artikulli që është publikuar, më 16 korrik, në faqen “au.active24live.com”.

Në ballinën e lajmit janë vendosur fotografitë e pasaportës së Shqipërisë dhe të Kosovës, ndonëse artikulli flet vetëm për qytetarët e Republikës së Shqipërisë.

Përkundër faktit që në fotografinë që është ilustruar lajmi ka qenë edhe flamuri i Kosovës dhe në titull janë përmend “shqiptarët”, vendimi nuk vlen edhe për shqiptarët dhe komunitetet tjera që jetojnë në Republikën e Kosovës.

Në lajm është treguar se “të gjithë shqiptarët mund të udhëtojnë pa viza në Arabinë Saudite”, duke iu referuar vendimit që ka ndërmarrë Qeveria e Shqipërisë. 

Në bazë të një vendimi të qeverisë së Edi Ramës, më 5 shkurt 2020, është miratuar memorandumi i bashkëpunimit, ndërmjet Këshillit të Ministrave të Republikës së Shqipërisë dhe qeverisë së Mbretërisë së Arabisë Saudite, për heqjen reciproke të vizave për qëndrim afatshkurtër për mbajtësit e pasaportave diplomatike të shërbimit dhe private për shtetasit e të dyja vendeve.

Për dallim nga pasaporta e Shqipërisë, me pasaportën e Kosovës mund të udhëtosh në shumë më pak vende pa vizë. Kosova vazhdon të mbetet e izoluar nga Evropa për shkak të mosliberalizimit të vizave.

Shqipëria, Bregu i Fildishtë, Domenika, Ekuadori, Gambia, Haiti, Maqedonia Veriore, Mikronezia, Mali i Zi, Territoret Palestineze, Serbia, Shri Lanka, Turqia, Shën Vinsent dhe Grenandine, janë vendet ku kosovarët mund të shkojnë pa viza.