Rrena për marshimin e ushtrisë serbe dhe frikësimin e qytetarëve të Preshevës
Deklarata
Qytetari nga Presheva: Ushtria e Serbisë po shkakton frikë, po këndojnë e po thonë se po nisemi për Kosovë.
Vlerësimi
Rrenë
Video e publikuar është realizuar në vitin 2018 dhe jo në vitin 2021. Publikimi i video është bërë në kohën kur në veri të Kosovës janë shkaktuar tensione pas vendosjes së masës së reciprocitetit për targat e automjeteve dhe bllokimit të rrugëve nga serbet.
Artikulli
Një faqe në Facebook me emër “Gazeta NewBorn” e cila ka 359 mijë e 828 pëlqime në këtë rrjet social gjatë ditës së djeshme shpërndau një video në të cilën pretendohej se në Krushimlije të Serbisë ushtria e këtij shteti po këndon këngë e po frikëson banorët shqiptar.
“Qytetari nga Presheva: Ushtria e Serbisë po shkakton frikë, po këndojnë e po thonë se po nisemi për Kosovë. Vendi: Krushumlije, rruga që qon drejt Podujevës”, thuhet në përshkrimin e videos së publikuar nga faqja “Gazeta NewBorn”.
Por, videoja e cila deri më tani ka marrë më shumë se 60 mijë shikime, është e vjetër, e cila mund të verifikohet lehtë.
Në kanalin YouTube, video e njëjtë është publikuar në vitin 2018.