Kryetari i Junikut Agon Kuçi | Foto: Atdhe Mulla
Rrena e Kryetarit të Junikut për Numrin e Drejtoreshave
Deklarata
Agron Kuçi: “Minimum do të jenë tri gra që do të jenë drejtoresha të drejtorive të Komunës”.
Vlerësimi
Rrenë
Kuçi nuk e ka mbajtur fjalën e dhënë, për t’i emëruar tri gra në krye të drejtorive komunale. Janë emëruar vetëm dy drejtoresha, nga 7 drejtori. Krahasuar me disa komuna të tjera, Juniku qëndron më mirë, por ende larg barazisë gjinore që kërkohet në Ligjin për Barazi Gjinore, që pozitat duhet të ndahen përgjysmë në mes të dy gjinive.
Artikulli
Agron Kuçi, në nëntor të vitit të kaluar ka arritur që të rizgjedhet në mandatin e tij të dytë si kryetar i Komunës së Junikut.
Kuçi në Emisionin “Debat Pernime” të udhëhequr nga Jeta Xharra kishte premtuar se në mandatin e tij të dytë do të emërojë të paktën tri gra në krye të drejtorive komunale.
”…mendoj që minimum do të jenë tri gra që do të jenë drejtoresha të drejtorive të komunës”, është zotuar kryetari i Junikut, Agron Kuçi.
Por, Kuçi nuk e ka mbajtur fjalën e dhënë. I ka emëruar vetëm dy gra në poste të drejtorive.
Dy drejtoritë e udhëhequra nga gratë në komunën e Junikut janë Drejtoria për Buxhet dhe Financa që udhëhiqet nga Kosovare Gacaferi dhe drejtoreshë për Administratë të Përgjithshme është Leonita Jasiqi.
Komuna e Junikut i ka 7 drejtori, emërimi i dy grave përbën 28 për qind e pozitave. Krahasuar me disa komuna të tjera, Juniku qëndron më mirë, por ende larg barazisë gjinore që kërkohet në Ligjin për Barazi Gjinore, që pozitat duhet të ndahen përgjysmë në mes të dy gjinive.
