Përkundër premtimit të Imri Ahmetit, stadiumi i KF “Arbëria” ende nuk është finalizuar
Deklarata
Në fakt stadiumi i Lipjanit është i gatshëm. Brenda 5-6 ditësh, 10 dite maksimumi do ta kemi të gatshëm në Dobrajë. Ajo që dua të sigurojë Dobrajën që shumë shpejt do të përfundojë dhe klubi i tyre do të kthehet përsëri në Superligë
Vlerësimi
Me kos
Stadiumi i qytetit në Lipjan është finalizuar. Ndërsa, stadiumi në Dobrajë të Madhe ende nuk është lëshuar në funksion. Stadiumi është në përfundim e sipër.
Artikulli
Kryetari i rizgjedhur i Komunës së Lipjanit ka premtuar se stadiumi i Klubit të Futbollit “Arbëria” në fshatin Dobrajë e Madhe do të jet i gatshëm gjatë shtatorit.
Më 21 shtator të këtij viti, Ahmeti në Debat Përnime ka premtuar se stadiumi do të jetë i gatshëm maksimumi brenda 10 ditësh.
“Në fakt stadiumi i Lipjanit është i gatshëm. Brenda 5-6 ditësh, 10 dite maksimumi do ta kemi të gatshëm në Dobrajë. Ajo që dua të sigurojë Dobrajën që shumë shpejt do të përfundojë dhe klubi i tyre do të kthehet përsëri në Superligë”, ka thënë ai në debatin zgjedhor.
Ndërkaq, nga klubi dhe nga komuna kanë thënë për KALLXO.com se stadiumi është në finalizim e sipër.
KALLXO.com ka siguruar edhe fotografi nga punimet në stadium. Nga pamjet shihet se fusha ndihmëse e stadiumit posedon barin artificial dhe vijat e bardha, kurse stadiumi kryesor është në punim e sipër.
Drejtori i KF “Arbëria”, Labinot Gashi ka thënë për KALLXO.com se klubi aktualisht lojërat po i mban në stadiumin e qytetit në Lipjan.
“Stadiumi i Ulpianës ‘Sami Kelmendi’ në Lipjan, ka përfunduar dhe sot e kemi lojën këtu në stadium të qytetit. Për Dobrajë të Madhe, stadiumi është në përfundim e sipër, dje janë hedhë vijat e bardha sintetike, është në përfundim e sipër”, tha ai më 19 nëntor 2021.
Gashi theksoi se nuk e di se kur saktësisht mund të funksionalizohet stadiumi.
“Nuk mundem me ditë për sa kohë përfundon, varet nga punimeve. Tash pas vijave të bardha do të vendoset veç goma dhe është e gatshme. Do të thotë është në finalizim e sipër”, u shpreh ai.
Edhe Komuna e Lipjanit ka thënë për KALLXO.com se “Stadiumi është krejt në fund të punimeve dhe duhet deri në fund të vitit me u përfundu”.
Çështja e stadiumeve në Lipjan ka qenë temë e debatit mes kandidatëve për kryetar të Lipjanit për zgjedhjet lokale të 17 tetorit.
Zgjedhjet lokale në Lipjan i ka fituar Imri Ahmeti i LDK-së, pa balotazh pasi ka marrë mbi 50 për qind të votave të qytetarëve. Ai do ta qeverisë komunën në mandatin e tretë radhazi.