Nënkryetari i Ferizajt zotohet që nuk do të përsëriten gabimet në raportin e Auditorit të vitit 2020

“Ne jemi njerëz gabojmë do t’i marrim masat dhe do të veprojmë komfor rekomandimeve të auditorëve dhe besoj që në raportin e vitit 2020 nuk do të përsëriten këto”

Në debatin e mbajtur në Komunën e Ferizajt për gjetjet e auditorit dhe zbatimin e rekomandimeve, nënkryetari i Komunës së Ferizajt, Arton Gavazi ka premtuar që do t’i marrin parasysh rekomandimet e auditorit në lidhje me vërejtjet për menaxhimin financiar dhe kontrollet.

Gavazi është zotuar që vërejtjet e tilla nuk do të përsëriten në raportin e vitit 2020.

“Ne jemi njerëz gabojmë do t’i marrim masat dhe do të veprojmë komfor rekomandimeve të auditorëve dhe besoj që në raportin e vitit 2020 nuk do të përsëriten këto”, tha nënkryetari i komunës së Ferizajt, Arton Gavazi.

Nënkryetari Gavazi kishte deklaruar se në këto dy pika kanë ngecje për shkak se nuk i kanë zbatuar në mënyrë efektive.

Sipas raportit të Zyrës së Audtimit për vitin 2019, Komunës së Ferizajt i janë dhënë 20 rekomandime, 5 më pak se në vitin paraprak

Rekomandimet kryesisht kanë qenë për të hyrat, shpenzimet, menaxhimin e pasurimeve dhe detyrimeve

Komuna e Ferizajt është ndër institucionet që në 2018 ka marrë më së shumti rekomandime nga Auditori për të adresuar lëshimet e shkeljet në këtë komunë.

25 rekomandime ka marrë kjo komunë nga Zyra Kombëtare e Auditimit në vitin 2018, që krahasuar me vitin 2017 kur i kishte pranuar 17 rekomandime kishte një rritje për 7 sosh. Rekordi i kësaj komune sa i përket numrit të rekomandimeve ishte shënuar në vitin 2016, kur kishte pranuar 29 rekomandime nga auditori.

Fusha e prokurimit është një prej fushave në të cilën Auditori ka gjetur më së shumti parregullsi në vitin 2018. Vetëm në prokurim publik kjo Komunë ka marrë 11 rekomandime në vitin 2018 për 11 dobësi e shkelje të identifikuara në këtë fushë.