Kurti nuk e mban premtimin e dhënë për ministra pa aktakuza

Albin Kurti (04.02.2021) – “Jo, nuk do të kemi ministra me aktakuza”

Kryeministri i Kosovës, Albin Kurti gjatë fushatës zgjedhore ishte zotuar se kabineti qeveritar nuk do të ketë njerëz me aktakuza.

Këtë zotim Kurti e kishte dhënë në “DebatPernime” përballë Jeta Xharrës.

“Jo, nuk do të kemi ministra me aktakuza”, ishte përgjigjur prerazi Kurti më 4 shkurt.

Edhe deputetja e Lëvizjes Vetëvendosje, Doarsa Kica – Xhelili, në “DebatPernime”, ku është diskutuar për sundimin e ligjit dhe luftimin e korrupsionin e ka dhënë zotimin e njëjtë me Kurtin.

“Jo”, është përgjigjur shumë shkurt Kica – Xhelili kur është pyetur nëse Qeveria Kurti do të ketë ministra me aktakuza.

Pjesë e Qeverisë Kurti 2 është edhe Liburn Aliu, si ministër i Mjedisit, Planifikimit Hapësinor dhe Infrastrukturës. Atij i është besuar posti i ministrit edhe pse ndaj tij më 24 korrik të vitit 2020 ishte ngritur akzakuzë për keqpërdorim të detyrës zyrtare për kohën kur ishte drejtor i Urbanizmit në Komunën e Prishtinës. Edhe pse aktakuza ndaj Aliut ishte ngritur në korrik të vitit 2020, publikimi i saj ishte bërë vetëm pasi i njëjti ishte emëruar ministër në qeverinë Kurti II.

Në qershor të këtij viti aktakuza për keqpërdorim të detyrës ndaj Liburn Aliut dhe zyrtarëve të tjerë është hedhur poshtë nga Gjykata e Prishtinës.

Rreth dy muaj pasi që Gjykata e Prishtinës e kishte hedhur poshtë aktakuzën ndaj ministrit Liburn Aliu dhe të tjerëve, Gjykata e Apelit e ka anuluar këtë vendim dhe e ka kthyer çështjen në rivendosje edhe njëherë në Gjykatën Themelore.

Përmes një njoftimi për media, Gjykata e Apelit ka njoftuar se ka aprovuar ankesën e Prokurorisë.

“Gjykata e Apelit e Kosovës ka aprovuar kërkesën e Prokurorisë Themelore në Prishtinë në çështjen penale kundër të akuzuarve L.A., A.O., Z.R., N.K.,B.U. dhe M.B-P. Aktvendimi i Gjykatës Themelore në Prishtinë – Departamenti për Krime të Rënda, i datës 14.06.2021, është anuluar dhe çështja i kthehet Gjykatës së njëjtë në rivendosje“, thuhet në njoftimin e Apelit.

Në njoftimin e Apelit thuhet se pas shqyrtimit të shkresave të lëndës dhe ankesës së Prokurorië Themelore në Prishtinë, në këtë çështje penalo-juridike, është vlerësuar se aktvendimi i ankimuar duhet anuluar dhe kthyer në rivendosje.

Ministri i Infrastrukturës dhe Ambientit, Liburn Aliu, ka thënë se nuk do të jep dorëheqje nga pozita e tij edhe nëse aktakuza do të vërtetohet nga Gjykata.

“Unë jam i gatshëm kurdoherë që ta pranoj shkarkimin tim, por për këtë aktakuzë unë nuk jap dorëheqje. Ajo çka ka ndodh në Prishtinë është krim të cilin e kam luftu dhe vazhdoj me luftu. Kur të luftosh të godasin”, ka thënë Aliu. “Burimi i aktakuzës sime, krejt sulmet e përditshme që na bëhen neve kanë të bëjnë me lëndët që i qojmë në prokurori dhe i hetojmë për ditë.”

Ai ka thënë se ende nuk e ka pranuar vendimin e Gjykatës së Apelit për të kthyer në rivendosje vendimin e Gjykatës Themelore për të hedhë poshtë aktakuzën kundër Aliut.

“Nuk më ka ardh ende vendimi i shkruar po besoj që e marr shpejt por pak a shumë e kuptoj është e njëjta ripërtypje dhe rikthim i të njëjtës situatë. Është kthyer mbrapsht për fatin se gjykatësi nuk i ka specifiku rastet veç e veç ne veç kemi qenë grup ka qenë si duket më e përgjithësuar ajo me aq sa pash prej mediav që për mua është arsyetim teknik”, ka thënë Aliu.

KALLXO.com, ka provuar më 4 gusht të kontaktojë me deputeten Kica Xhelili, për të ditur se cili është qëndrimi i saj tash, dhe a ka ndryshuar diçka, por nuk kemi arritur të marrim përgjigje deri në publikimin e artikullit.