Ilustrimi i rremë për Kurtin e Vuçiqin në lajmin për armë bërthamore

Ilustrimi i artikullit me titullin “Vjen reagimi i ashpër nga SHBA për Rusinë, ja çfarë e pret nëse përdorin ar.më bër.thamore”.

Në portalin newskosovo.news, më 3 tetor 2022 është publikuar një përmbajtje me titullin “Vjen reagimi i ashpër nga SHBA për Rusinë, ja çfarë e pret nëse përdorin ar.më bër.thamore”.

Artikulli me të njëjtën përmbajtje është shpërndarë më datën 3 tetor 2022 edhe në faqen “Gazeta Ditore”, në Facebook.

Në ballinën e kësaj përmbajtjeje është fotografia e kryeministrit të Kosovës, Albin Kurti dhe presidentit të Serbisë, Aleksandar Vuçiq, ndërsa përmbajtja e tekstit nuk ka të bëjë as me Kurtin as me Vuçiqin.

Teksti i referohet një deklarate të ish-drejtorit të CIA-s dhe gjenerali amerikan, David Petraeus i cili ka folur për median ABC News për reagimin e SHBA-së ndaj një përshkallëzimi të mundur bërthamor nga Rusia.

“SHBA dhe aleatët e saj do t’i shkatërrojnë trupat dhe pajisjet e Rusisë në Ukrainë dhe do ta fundosin flotën e saj të Detit të Zi nëse presidenti rus Vladimir Putin përdor armë bërthamore”- tha të dielën ish-drejtori i CIA-s dhe gjenerali i ushtrisë në pension, David Petraeus.

Petreaus tha se nuk ka folur me këshilltarin e sigurisë kombëtare Jake Sullivan për reagimin e mundshëm të SHBA-së, por ai i tha ABC News që beson se një sulm bërthamor nga Rusia në Ukrainë do të shkaktonte një përgjigje të NATO-s të udhëhequr nga SHBA.

Lufta në Ukrainë ka nisur më 24 shkurt 2022. Vetë Putin e quan luftën si “operacion special ushtarak” për të çmilitarizuar Ukrainën. Perëndimi është përgjigjur ndaj Rusisë, duke goditur ekonominë e këtij shteti me sanksione të ashpra.