Huqja mediale për afatin e Kurtit për ta formuar qeverinë
Deklarata
Gazeta Express: Kurtit i kanë mbetur edhe 4 ditë, 6 orë dhe disa minuta afat për ta formuar qeverinë.
Vlerësimi
Rrenë
Koha e shënuar nga portali është e pasaktë, pasi Kurti ka edhe 5 ditë e disa orë kohë për ta themeluar qeverinë.
Artikulli
Kur ditët po numërohen së prapthi për mandatarin për ta formuar qeverinë e Kosovës, mediat po e numërojnë këtë kohë në mënyra të ndryshme.
Në hyrje të portalit Gazetaexpress.com, figuron afati i mbetur i Albin Kurtit për ta formuar Qeverinë e re të Republikës së Kosovës.
Në të shkruan se Kurtit i kanë mbetur edhe 4 ditë, 6 orë dhe disa minuta afat për ta formuar qeverinë.
Koha e shënuar nga portali është e pa saktë, pasi Kurti ka edhe 5 ditë e disa orë kohë për ta themeluar qeverinë.
Me datë 20 janar 2020, Lëvizja Vetëvendosje ka dërguar tek Presidenti i shtetit propozimin e mandatarit për formimin e qeverisë.
Sipas Ligjit për Procedurën e Përgjithshme Administrative, llogaritja e afatit ligjor të përcaktuar me ditë fillon të rrjedhë nga dita e nesërme dhe jo nga dita kur ka ndodhur ngjarja.
Kjo parashihet me nenin 81 pika 2, të procedurës Administrative, në të cilin parashihet llogaritja e afatit.
“Kur afati përcaktohet në ditë, në llogaritjen e tij përjashtohet dita kur ka ndodhur ngjarja nga e cila fillon të ecën afati”, thuhet në ligj.
Pra, afati pesëmbëdhjete ditor për formimin e qeverisë Kurti ka filluar të numërohet nga data 21 janar 2020, ndërsa skadon me datë katër shkurt 2020, që i bie se Albin Kurti ka në dispozicion edhe 5 ditë për ta formuar qeverinë.