Kryeinspektori i dënuar për korrupsion shpëton pa asnjë ditë burg
Kryeinspektori i Minierave dhe Mineraleve, Nuredin Bislimi i cili kishte pranuar se kishte marrë ryshfet, në janar të vitit 2014 ishte dënuar me 10 muaj burgim dhe 2 mijë euro gjobë, por mund të shpëtojë pa vuajtur asnjë ditë nga ky burg i ‘prerë’ nga gjykata.
Ai dënimin nuk e vuajti asnjëherë pasi arratis nga Kosova.
Tani, pesë vite nga dënimi, ish-Kryeinspektori Nuredin Bislimi mund të kthehet i lirë në Kosovë pa frikën se mund të prangoset dhe dërgohet në burg.
Kjo pasi me datën 8 maj 2019, Gjykata e Pejës mori vendim për parashkrimin e ekzekutimit të dënimit ndaj ish-Kryeinspektorit.
Lajmin së dënimi ndaj Bislimit është parashkruar e konfirmoi zëdhënësja e Gjykatës, Tringa Zhuti.
“Me datën 8 maj 2019, Gjykata ka marrë aktvendim për parashkrimin e ekzekutimit të dënimit”, tha Zhuti për KALLXO.com.
Bislimi akuzohej nga Prokuroria e Pejës se gjatë vitit 2013 në cilësinë e kryeinspektorit ka kërkuar përfitime për vete.
Sipas prokurorisë ai ia kishte ndërprerë punimet seperacionit “Elezaj“ në Grabanicë të Klinës, e mandej nga i dëmtuari Bedri Elezaj, i cili është pronar i seperacionit kishte kërkuar shumën prej 1.000 eurosh, me çka ka kryer veprën penale të marrjes së ryshfetit.
https://kallxo.com/prokurorja-inspektori-u-dergua-ne-dreka-e-darka/
