Kosova lejon qarkullimin e autobusëve të ndaluar në Morinë

Ministria e Infrastrukturës dhe Transportit, ka njoftuar qytetarët se ka lejuar qarkullimin e autobusëve transit përmes Kosovës, të cilët ishin ndaluar në pikën kufitare Morinë, të shtunën (15 qershor).

Në njoftim thuhet se ky vendim ka ardhur pas kërkesës së Ministrisë së Infrastrukturës së Shqipërisë, përmes ambasadës së tyre në Kosovë.

“Me qëllim të evitimit të problemeve që mund t’u shkaktohen qytetarëve, të cilët e kanë më të lehtë të udhëtojnë përmes Kosovës, nga Tirana për në Bajram Curr dhe anasajelltas, MIT ka pezulluar vendimin për ndalim të dy operatorëve nga Shqipëria, deri të mërkurën. Ne presim nga autoritetet e Shqipërisë, por edhe nga këto kompani, që t’i përmbahen lejes së tyre vetëm për udhëtim transit nëpër Kosovë, dhe jo ndalesë nëpër stacione për të marrë udhëtarë.”, është thënë në njoftimin e ministrisë.

Tutje është sqaruar se për këto shkelje të vazhdueshme, kanë pranuar ankesa nga operatorët vendas, të cilëve u janë shkaktuar dëme dhe të njëjtat janë prezantuar para institucioneve relevante të Shqipërisë.

Gjithastu është bërë e ditur se rreth kësaj çështje, do të diskutohet në një takim mes komisioneve teknike të të dyja vendeve, të mërkurën e ardhshme.