Shpend Ahmeti ‘zhgënjen’, performon më dobët se 24 komuna të tjera
Ministria e Pushtetit Lokal ka prezantuar raportin e performancës së komunave të Kosovës. Në këtë raport janë kryer matjet për 19 fusha të ndryshme për 36 komuna të Kosovës.
Ky raport i performancës është bërë për periudhën janar-dhjetor 2019.
Ndonëse është kryeqytet dhe ka vëmendjen më të madhe nga institucionet qendrore, si dhe është më i veçuar nga komunat e tjera për shkak se ka Ligj të saj, Prishtina nuk është renditur mirë në raportin e preformancës nga ana e Ministrisë së Pushtetit Lokal.
Në këtë raport, Komuna e Prishtinës është renditur në pozitën e 25 me performancë prej 59.1%.
Komuna me performancën më të mirë ka dal komuna e Drenasit, ndërsa me performancën më të dobët komuna e Zubin Potokut.
Ndërsa mesatarja e përgjithshme e performancës për të gjitha komunat, sipas këtij raporti ka dal të jetë 61.6%.
Performanca në Shërbimet Pulbike Administrative
Ndonëse është kryeqendra e Kosovës, Komuna e Prishtinës sipas raportit të performancës për fushën e shërbimeve publike është renditur si një nga komunat me shërbimin më të dobët sipas Ministrisë.
Komuna e Prishtinës është renditur si Komuna e 33 më e dobët sa i përket performancën në ofrimin e shërbimeve administrative.
Para Prishtinës me performancë të dobët gjenden vetëm Shtërpca, Mitrovica Veriore dhe Zubin Potoku.
Sipas këtij raporti, Komuna e Prishtinës është vlerësuar me vetëm 32.08% që ka arritur të perfrmoj në ofrimin e shërbimeve. Ndërsa komuna me ofrimin më të madh të shërbimve administrative ka qenë Rahoveci me 96.5%.
Kjo fushë përfshinë shërbimet publike administrative dhe efikasitetin e shqyrtimit të kërkesave të qytetarëve, personave fizik dhe juridik, nga organet e komunës për çështjet që lidhen me kompetencat e tyre dhe të cilat kalojnë nëpërmjet Qendrës për Shërbimin e Qytetarëve në Komunë. Njëkohësisht, kjo fushë matë gatishmërinë e komunave për të ofruar shërbime administrative në formën online apo përmes e-kioskut.
Në këto përfshihen kërkesat për leje të ndryshme komunale, dokumentet e gjendjes civile, kërkesat për qasje në informata, kërkesat qytetare për financim dhe adresim në organet përgjegjëse të komunës.
Transparenca Komunale
Ndërsa sa i përket transparencës Komunale, Prishtina qëndron në mes të komunave. Sipas raportit të performancës të Ministrisë së Pushtetit Lokal, Komuna e Prishtinës është renditur e 17 në listën e komunave më transparente.
Sipas këtij raporti, Komuna e Prishtinës është vlerësuar me 89.52% në fushën e transparencës komunale.
Përgjegjshmëria Komunale
Përgjegjshmëria komunale është një tjetër fushë në të cilën Ministria e Pushtetit Lokal ka mbledhur të dhëna për performancën komunale.
Në këtë fushë përfshihen ndërmarrjet e veprimeve ligjore për suspendimin e zyrtarëve për të cilët ka pasur aktakuzë apo vepra të tjera penale, të punësuarit me nevoja të veçanta, niveli i adresimit të raportit të auditorit, dëgjimet publike, pjesëmarrja e qytetarëve në debate publike e të tjera çështje.
Sipas raportit të MPL-së, në këtë fushë, Komuna e Prishtinës është renditur e 25 nga 36 komunat që janë pjesë e raportit, me 57.7%.
Barazia në Punësim, Shërbime Sociale dhe Familjare
Kjo fushë përbënë përfaqësimin e grupeve të ndryshme në punësim komunal, si dhe shërbimet sociale të grupeve më me nevojë në komuna. Në kuadër të punësimit treguesit masin nivelin e punësimit të personave me aftësi të veçanta në institucionet komunale, si dhe përqindjen e përfshirjes së komuniteteve joshumicë.
Në këtë fushë Prishtina renditet në vendin e 16 sipas raportit të MPL-së me 63%. Ndërsa komuna me përqindjen më të lartë është Ferizaj me 94.67%.
Kulturë, Rini dhe Sport
Në kuadër të kësaj fushe maten aktivitetet komunale kulturore, rinore dhe sportive, si një nga kompetencat vetanake të komunave. Fusha mbulon edhe shërbimet e ofruara nga komunat që kanë të bëjnë me kulturën, rininë dhe sportin, përfshirë hapësirat sportive.
Në këtë fushë, sipas raportit të hartuar nga Ministria e Pushetit Lokal, Komuna e Prishtinës qëndron shumë dobët.
Komuna e Prishtinës është renditur si Komuna e 4 më dobët, apo Komuna e 32 në Kosovë për nga shërbimet që i ofron për këto 3 aktivitete.
Ajo është vlerësuar me 35.3% në raportin e Performancës së Komunave. Ndërsa komunat që kanë plotësuar 100% nevojat për këtë fushë janë Rahoveci, Ranillugu, Parteshi dhe Graçanica.
Menaxhimi i fatkeqësive
Kjo fushë matë planifikimin, organizimin dhe udhëheqjen e sistemit të organizuar të komunës për tu përgjigjur ndaj dukurive të shkaktuara nga fuqitë e pakontrolluara dhe nga fuqitë tjera. Fusha ka vetëm një rezultat dhe dy tregues, që kryesisht vlerësojnë realizimin e planit për mbrojtje nga fatkeqësitë natyrore, si dhe nivelin e përgjigjeve të institucioneve komunale ndaj rasteve të paraqitura në këtë fushë.
Në kuadër të kësaj fushe, Komuna e Prishtinës është renditur në vendin e 25 me 81.8%.
Planifikimi Hapësinor
Kjo fushë matë zhvillimin hapësinor komunal nëpërmjet instrumenteve të planifikimit hapësinor, por edhe nivelin e planifikimit të ndërtimeve komunale. Si tregues për këtë fushë janë marrë objektet e reja me leje ndërtimi, ndërtesat e reja të inspektuara, kërkesat e shqyrtuara për leje të ndërtimit si dhe sipërfaqja e territorit të Komunës që është i mbuluar me rregullese.
Në këtë fushë Komuna e Prishtinës qëndron më mirë se në disa të tjera.
Sipas raportit të MPL-së, Prishtina është renditur si komuna e pestë në raportin e performancës në fushën e planifikimin hapësinor me 64.57%.
Hapësira Publike
Kjo fushë matë hapësirat publike të cilat janë me interes për qytetarët, menaxhohen nga komunat dhe të cilat ndikojnë në cilësinë dhe standardin e jetesës së qytetarëve. Këtu përfshihen 3 tregues. Hapësirat publike të pajisura me ndriçim publik, sipërfaqja e hapësirave publike që mirëmbahen rregullisht dhe sipërfaqja e hapësirave të gjelbra për kokë banori.
Në këtë fushë, Prishtina është Komuna e vetme që performon me 100%, sipas raportit të performancës nga ana e Ministrisë.
Infrastruktura rrugore
Kjo fushë e performancës matë rrugët komunale dhe infrastrukturën përcjellëse që janë nën kompetencën e komunës.
Në këtë fushë Komuna e Prishtinës renditet në vendin e 23 me performancë prej 43.86%, ndërsa komuna me performancën më të lartë në fushën e infrastrukturës rrugore është Hani i Elezit me 86.77%.
Në kuadër të kësaj fushë hyjnë rrugët lokale të riasfaltuara, rrugën në zonën urbane që kanë shteg të biçikletave, gjatësia e rrugëve lokale të pajisura me ndriçim publik e trotuar, rrugët lokale që mirëmbahen gjatë sezonit të dimrit dhe verës si dhe rrugët lokale të shtruara.
Transporti Publik
Kjo fushë matë ofrimin e transportit publik për qytetarët e komunës. Në kuadër të kësaj fushe hyjnë vendndalimet e shenjëzuara për automjetet e transportit publik, vendbanimet e përfshira në transportin publik si dhe realizimin e planit komunal për transport publik.
Në këtë fushë, sipas raportit të MPL-së, Komuna e Prishtinës renditet në vendin e 16 me performancë prej 78.5%.
Parkingjet Publike
Hapësirat për parkim publik janë vende në pronësi publike dhe private, me një numër të caktuar të vendeve të parkimit, të ndërtuara me standardet e kërkuara dhe të caktuara për parkimin e mjeteve motorike. Për më tepër, kjo fushë matë numrin e parkingjeve në komunë dhe numrin e vendparkimeve kundrejt veturave të regjistruara në komunë, po ashtu sa ka vende për taksi kundrejt numrit të taksive të licencuara dhe sa parkingje publike kanë vende të rezervuara për persona me nevoja të veçanta.
Në këtë fushë, sipas raportit të MPL-së, Komuna e Prishtinës renditet e 9 në prefromancë me 57.2%.
Uji i pijshëm
Kjo fushë matë sigurimin apo furnizimin e qytetarëve dhe bizneseve me ujë të pijshëm si dhe realizimin e projekteve komunale për ujë të pijshëm.
Sipas raportit të performancës së MPL-së, Komuna e Prishtinës në këtë fushë preferomon me 95.5%.
Kanalizimi
Kjo fushë matë përfshirjen e ekonomive familjare, bizneseve dhe institucioneve në sistemin e kanalizimit si dhe realizimin e projekteve komunale për rrjet të kanalizimit. Po ashtu, ky tregues matë edhe përfshirjen e vendbanimeve të komunës në rrjetin për trajtimin e ujërave të zeza si një nga faktorët mjaft të rëndësishëm në ambient, kushte të jetesës dhe shëndetin publik.
Në këtë fushë, Komuna e Prishtinës renditet në vendit e 28, me perfromancë prej 25%.
Menaxhimi i Mbeturinave
Kjo fushë matë mbledhjen dhe deponimin e mbeturinave në komunë si dhe grumbullimin e të hyrave nga faturat e lëshuara për menaxhimin e mbeturinave.
Tregues për performacën në këtë fushë janë marrë sasia e deponimit të mbeturinave në kilogram për kokë banori, inkasomi i mjeteve për mbledhjen e mbeturinave, realizimi i orarit për mbledhjen e mbeturinave, ekonomitë familjare që kanë qasje në sistemin e grumbullimit të mbeturinave si dhe realizimi i planit komunal për menaxhimin e mbeturinave.
Sipas raportit të performancës, Komuna e Pirshtinës performon në këtë fushë në maksimumin e saj, me 100%.
Mbrojtja e Mjedisit
Kjo fushë matë veprimet e komunës përkatëse për mbrojtjen dhe ruajtjen e mjedisit natyror dhe jetësor (urban dhe rural) nga dëmtimi, degradimi apo ndotja si pasojë e veprimtarisë njerëzore ose të ndikimit natyror.
Treguesit për matjen e performancës në këtë fushë kanë qenë ndërtesat e reja që kanë zbatuar lejet mjedisore komunale, lejet mjedisore komunale që janë lëshuar si dhe realizimi i planit të veprimit lokal në mjedis.
Këtu, kryeqyteti renditet në vendin e 27 me 37.2%.
Përfaqësimi Gjinor
Përfaqësimi gjinor është një tjetër fushë e Raportit të Performancës së Komunave që matet duke përfshirë qasjen e të dy gjinive në programet për zhvillim social, ekonomik, si dhe në aktiviteteve komunale. Po ashtu, treguesit matin shkallën e përfaqësimit të të dy gjinive në institucionet lokale, trupat e kuvendeve komunal, barazia gjinore tek emërtimet e rrugëve, pjesëmarrje e grave në takime publike, gratë e punësuara në institucione publike komunale e të tjera.
Sipas këtij raporti, Komuna e Prishtinës renditet në pozitën e 16 nga të gjitha komunat me performancë prej 42.3% të përfaqësimit gjinor.
Arsimi Parauniversitar
Në raportin e performancës së Komunave është futur edhe fusha e arsimit paraunivestiar. Ky tregues synon rezultate në hapësira për çerdhe dhe shkolla të pajisura me kabinete për internet, masa të efiçencës së energjisë, rekrutimin e personelit arsimor, licencimin e mësimdhënësve, mjetet e konkretizimit, pajisjet e shkollave me mjete mësimore, kabinete të TIK-ut, si dhe kushtet e sigurisë në shkollë.
Në këtë fushë, Komuna e Prishtinës renditet në pozitën e 24 me performancë prej 53.17%.
Kujdesi Primar Shëndetësor
Kjo fushë matë infrastrukturën dhe hapësirat e destinuara për shëndetësinë primare, resurset dhe personelin e mjaftueshëm, si dhe ofrimin e shërbimeve nga niveli komunal.
Sipas raportit të MPL-së, Prishtina renditet në vendin e katërt për nga performanca në këtë fushë me 65.7%.
Zhvillimi Ekonomik Lokal
Fusha është e përbërë prej 1 rezultati dhe 4 treguesve. Kjo fushë mate aktivitetet e planifikuara dhe të zbatuara për zhvillimin e aktivitetit ekonomik në nivel lokal duke mobilizuar pronat komunale, dhe përditësim i rregullt i regjistrit të tatimpaguesve si dhe shkallë e lartë e inkasimit e tatimit në pronë.
Këtu Komuna e Prishtinës është renditur në vendin e 25 me performancë prej 48.3%.
