FOTO: Thaçi, Veseli, Selimi, dhe Krasniqi në Gjykatën Speciale

Gjykata refuzon kërkesat e mbrojtësve të Thaçit dhe Krasniqit për vënien në dispozicion të incizimeve të dëshmitarëve

Në Gjykatën Speciale në Hagë sot është mbajtur seanca e radhës ndaj ish-krerëve të Ushtrisë Çlirimtare të Kosovës, Hashim Thaçit, Kadri Veselit, Jakup Krasniqit dhe Rexhep Selimi.

Avokati David Hooper, i cili mbron Hashim Thaçin ka kërkuar nga gjykata që t’u vihen në dispozicion incizimet dëgjimore, të intervistave të dëshmitarëve, propozim ky i mbështetur edhe nga avokati i Krasniqit.

“Jam dakord i kuptoj vështirësitë por nëse do të na jepej mundësi që të kontrollojmë një intervistë shumë të gjatë, në fillim do të dëgjosh audion pastaj të lexosh intervistën…po duam të dëgjojmë intervistat që janë bërë, sepse kemi marr përkthimet nga shqipja në anglisht, shumë prej këtyre përkthimeve nuk kanë qenë veçanërisht të mira”, tha Hooper.

Gjykata Speciale përkatësisht gjyqtari Nikola Giju ka refuzuar kërkesën e mbrojtësve të Hashim Thaçit dhe Jakup Krasniqi që t’u vihen në dispozicion incizimet audio-vizive krahas transkriptimeve të intervistave të dëshmitarëve.

Sipas gjyqtarit Giju, janë të mjaftueshme transkriptet të cilat u janë vënë në dispozicion në gjuhen shqipe dhe angleze.

“Lidhur me nevojën për verifikimin e saktësisë se transkriptimeve është e pamjaftueshme për nxirren shtesë të incizimeve, duke qenë se ky verifikim mund të kryhet në bazë të transkriptimeve të vendosura në dispozicion që janë në gjuhën shqipe dhe angleze”, tha gjyqtari.

Tutje duke arsyetuar vendimin për refuzimin e kësaj kërkese, gjyqtari Giju ka thënë se argumenti i mbrojtjes lidhur me nevojën për një vlerësim të plot të dëshmitarit nuk është i bazuar mjaftueshëm duke qenë se mbetet si një argument hipotetik dhe i përgjithshëm.

“Në veçanti mbrojtja nuk arrin që t’i mbështet me baza se përse mbështetja e transkriptimit në dallim nga incizimet audio-vizive nuk i jep mundësi mbrojtje që të vlerësoj dëshminë e dhënë nga dëshmitarët në mënyrë të plotë. Në këto rrethana pasi nuk vërtetohet materiali i incizimeve audio-vizive unë e refuzoj kërkesën e mbrojtjes së Thaçit dhe Krasniqit për vendosjen në dispozicion të incizimeve audio-vizive krahas transkriptimeve të intervistave të dëshmitarëve dhe të akuzuarve”, theksoi Giju.

Hashim Thaçi, Kadri Veseli, Jakup Krasniqi dhe Rexhep Selimi po akuzohen se si drejtues të UÇK-së kishin kryer krime kundër njerëzimit gjatë luftës së fundit në Kosovë.

Për këto akuza ata po mbahen në paraburgim prej momentit kur ishin arrestuar në Kosovë.

Të gjitha krimet që Prokuroria pretendon se ishin kryer janë mohuar nga katër krerët e UÇK-së.

Ata po akuzohen se ndërmjet marsit 1998 dhe shtatorit 1999 kishin kryer krime të luftës dhe krime kundër njerëzimit, duke arrestuar dhe ndaluar persona civil në mënyrë të paligjshme, duke i trajtuar në mënyrë mizore, torturuar dhe zhdukur. Në mesin e shumë akuzave bëjnë pjesë edhe ato të vrasjeve të paligjshme.

Për të gjitha këto krime të pretenduara, prokurori Jack Smith i ngarkon Hashim Thaçin, Rexhep Selimin, Jakup Krasniqin e Kadri Veselin, të cilët sipas tij ishin në dijeni se këto krime ishin duke ndodhur dhe nuk kishin ndërmarrë asnjë veprim për parandalimin e tyre mirëpo kishin nxitur kryerjen e tyre.

Në këtë aktakuzë thuhet se Thaçi dhe të tjerët nxitën sulmet ndaj kundërshtarëve dhe nxitën vrasjen e tyre.

Sipas Prokurorisë, krerët e UÇK-së përmes deklaratave publike dhe veprimeve në terren, frikësuan, denigruan, eliminuan kundërshtarë dhe kërkuan të pozicionoheshin si i vetmi zë dhe si i vetmi përfaqësues legjitim i shqiptarëve të Kosovës.

Pjesë e aktakuzës 68-faqëshe të Prokurorisë janë edhe pretendimet për vrasje të paligjshme.

Këto vrasje theksohet se janë kryer në territore të ndryshme të Kosovës dhe Shqipërisë. Sipas Prokurorisë ato janë kryer në Likoc, Jabllanicë, Llapushnik, Drenoc, Malishevë, Bajgorë, Majac, Zllash, Kleҫkë, Kukës dhe Rahovec.

Në aktakuzë thuhet se një person gjatë vitit 1998 ishte mbajtur në kazermat e UÇK-së në Jabllanicë dhe ishte rrahur për vdekje nga pjesëtarët e UÇK-së. Aktakuza pretendon se fatin e njëjtë e kishin pasur edhe dy viktima të tjera të cilat ishin dërguar në kazermën e UÇK-së në Jabllanicë.

Përpos vrasjeve në Jabllanicë në aktakuzë pretendohet se në fshatin Llapushnik ishte arrestuar një person nga pjesëtarët e UÇK-së ishte rrahur dhe ishte marrë në pyetje dhjetë net rresht ndërsa në fund ishte vrarë.

Aktakuza tutje pretendon se pas një ofensive serbe, forcat e UÇK-së në Llapushnik kishin arrestuar afërsisht 30 persona, ku disa prej tyre më pas ishin lënë të lirë ndërsa të tjerët ishin qëlluar dhe vrarë.

Aty përshkruhet edhe për gjashtë vrasje të kryera në Drenoc.

Sipas Prokurorisë gjashtë burra ishin arrestuar, rrahur dhe vrarë dhe eshtrat e tyre nuk ishin parë më kurrë.

Pjesë e aktakuzës janë edhe akuzat për vrasjen e 11 civilëve serbë në Malishevë.

Sipas aktakuzës në korrik të vitit 1998 një grup prej 11 të arrestuarish serbë u transferuan në një dhomë në bodrumin e një ndërtese në Malishevë.

Aty përshkruhet se këta civilë ishin rrahur dhe shqelmuar nga anëtarët e UÇK-së, e më pas ishin qëlluar dhe vrarë.

Prokuroria e Specializuar në këtë aktakuzë ka përfshirë edhe qendrën e paraburgimit në Kleçkë.

Në këtë lokacion sipas Prokurorit të Specializuar, gjashtë persona ishin dërguar dhe ishin rrahur për vdekje nga anëtarët e UÇK-së.

Një tjetër person sipas Prokurorit të Specializuar kishte vdekur si rezultat i keqtrajtimit në Kukës. Në këtë keqtrajtim thuhet se kishte marrë pjesë edhe Sabit Geci.

Tre persona të tjerë ishin arrestuar në Rahovec, ata sipas aktakuzës ishin rrëmbyer nga ushtarët e UÇK-së në shtëpitë e tyre ndërsa nuk ishin parë më kurrë.

Arsyeja se pse krerët e UÇK-së akuzohen për krimet dhe vrasjet e sipërpërmendura sipas Prokurorit të Specializuar, është përgjegjësia komanduese.