Mbledhja e KGJK-së dhe KPK-së | Foto: KGJK
Këshilli Gjyqësor Reagon Për Votimin e Rekomandimeve për Aktivistët e Dënuar të VV-së
Pas miratimit të rekomandimeve të Lëvizjes Vetëvendosje, ku ndër të tjera kërkohet hetim i pavarur në rastin e aktivistëve të kësaj partie të dënuar për sulmin ndaj Kuvendit të Kosovës dhe hetimin e të gjithë personave në hierarkinë shtetërore, ka reaguar edhe Këshilli Gjyqësor i Kosovës.
Këshilli Gjyqësor i Kosovës, thotë se ligji garanton mbrojtje të të drejtave të njeriut dhe mjetet juridike të cilat kanë të drejtë i shfrytëzojnë të gjitha palët në procedurë.
“Çdo tejkalim i autorizimeve kushtetuese dhe ligjore konsiderohet ndërhyrje në punën e gjyqësorit”, thuhet në reagim.
Tutje KGJK thotë se respektimi i pushtetit gjyqësor dhe zbatimi i vendimeve gjyqësore është obligim për të gjithë qytetarët dhe institucionet e Republikës së Kosovës, pavarësisht përkatësisë etnike, fetare, racore, të nivelit arsimor, apo bartësve të funksioneve shtetërore.
“Me këtë rast, kërkojmë nga Kuvendi i Republikës së Kosovës si institucion i cili ka nxjerrë Kushtetutën dhe Ligjet mbi bazën e të cilave funksionon sistemi gjyqësori që t’i respektojë ato dhe të ndihmojë sistemin gjyqësor për përmbushjen e mandatit për forcimin e sundimit të ligjit në Republikën e Kosovës”.
Sot edhe Ministria e Drejtësisë ka shprehur shqetësim për kalimin në Kuvendin e Kosovës të rekomandimeve të Vetëvendosjes për aktivistët e dënuar të VV-së pa u shqyrtuar nga Komisioni për Legjislacion.
Paraprakisht deputetët e Kuvendit miratuan sot rekomandimet për aktivistët e dënuar të Vetëvendosjes dhe disa projektligje.
Këto janë rekomandimet e VV-së të votuara sot në kuvend:
- Për rastin e sulmit në ndërtesën e Kuvendit të Republikës së Kosovës më 4 Gusht 2016, të kërkohet dhe të mundësohet një hetim i plotë, i pavarur ndërkombëtar i tërë rastit, nga ndonjëri nga vendet perëndimore të BE, përfshirë vendet neutrale të Evropës Perëndimore dhe Zvicrën, përjashtuar rastin e Astrit Deharit që do të hetohet veçmas.
- Të hetohen dhe të gjenden përgjegjësit në hierarkinë e lartë të Policisë së Kosovës, të involvuar për inskenimin e sulmit në ndërtesën e Kuvendit më 4 gusht 2016 dhe për përndjekjen kriminale të aktivistëve të LVV për këtë rast.
- Të hetohen dhe të merren në përgjegjësi ligjore të gjithë personat përgjegjës në hierarkinë shtetërore, për përndjekjen e aktivistëve të LVV dhe vdekjen e Astrit Deharit.