Dukagjin Lipa tregon sa vështirë e kanë pasur të bindin artistë ndërkombëtarë të vijnë në Kosovë

Organizatori i Festivalit “Sunny Hill”, Dukagjin Lipa ka treguar se në fillim të festivalit ka qenë e vështirë të bindin artistë ndërkombëtarë të vijnë në Kosovë pasi edhe lajmet që shihnin për ta paraqisnin rrezik.

Ai në një intervistë për emisionin “Kallxo Përnime” shtoi se tani nuk e kanë më atë problem pasi kanë krijuar emër si festival.

“Bota nuk ka njohuri për Kosovën dhe nuk ka interes të merren me politika. Vitet e para kanë qenë shumë më të vështira për t’u bërë ftesë artistëve pasi menaxherët e tyre kanë hyrë e kanë shiku online për Kosovën, pastaj kanë parë se mund të jetë rrezik. Përpara ka qenë më problem t’i bindim, derisa tash nuk e kemi, pasi kemi krijuar emër dhe artistë të shumtë që kanë ardhur, kanë fjalë vetëm të mira për festivalin dhe produksionin, pasi është ndër më të mirët teknikisht për artistin”- ka thënë Lipa.

Sipas tij, qëllimi është të zhvillojnë një event në Kosovë që ndoshta dikush tjetër nuk ka mundësi në përmasat që i ka.

“Sa i përket produksionit, një pjesë e marrim me qira në Bullgari, Holandë, Angli pasi ka kërkesa të posaçme nga zërimi, drita, skena. Ne kemi line up prej më të mirëve në Europë, kemi kaluar shumë festivale në rajon që zhvillohen shumë vite”- shtoi me tej Lipa.

Edicioni i Sunny Hill Festival për vitin 2024 do mbahet ndërmjet 25 e 28 korrikut në Bërnicë të Prishtinës.