Rrugëtimi drejt suksesit në muzikë

Pianistja e talentuar nga Gjakova, Lyra Pylla, në qershor të vitit të kaluar e ka mbajtur koncertin e parë recital.

Të pasionuarit pas muzikës kanë pasur kënaqësinë që të dëgjojnë tingujt e programit gati një orësh që ka performuar Lyra. Për këtë performancë, 18-vjeçarja ishte përgatitur gati 6 muaj me profesoreshën e saj.

Që nga mosha 5-vjeçare, Lyra ka qenë pjesë e korit të fëmijëve dhe pas një viti filloi mësimet e pianos në klasën e profesoreshës Tringa Siqeca.

Lyra ka marrë pjesë në koncerte e gara brenda dhe jashtë vendit.

“Pikërisht kanë qenë paraqitjet në skenë që ma kanë shtu dashurinë për muzikë”, thotë ajo.

Lyra me orkestrën dhe korin kanë luajtur këngë shqiptare e gjermane, për çka thotë se kjo e ka bërë më të veçantë atë paraqitje.

Pianistja e re është duke vijuar mësimet në drejtimin piano instrumental në Shkollën e Mesme të Muzikës “Prenk Jakova” në Gjakovë.

Ajo planifikon që pas përfundimit të shkollës së mesme, të vazhdojë studimet në lëndën e dirigjimit.

“Më pëlqen gjithçka me muzikën dhe nuk mendoj që do ta ushtroja më mirë ndonjë profesion tjetër”, shprehet 18-vjeçarja.

Autorja Klementina Paloka është nxënëse e gjimnazit “Hajdar Dushi” në Gjakovë.

Ky botim është prodhuar me përkrahjen e Bashkimit Europian. Përmbajtja e këtij botimi është përgjegjësi e BIRN-it dhe në asnjë mënyrë nuk mund të konsiderohet si qëndrim i Bashkimit Europian.