Inspektorati Nuk Gjen Asnjë Shkelje në Burgun e Lipjanit

Inspektorati i Shërbimit Korrektues të Kosovës (ShKK) ka kryer një inspektim në Qendrën Korrektuese të Lipjanit pas rastit të vdekjes së të paraburgosurit Naser Makolli.

KALLXO.com merr vesh se pas këtij inspektimi është përgatitur një raport, i cili i është dërguar Ministrisë së Drejtësisë dhe ShKK-së.

I kontaktuar nga KALLXO.com, drejtori i Shërbimit Korrektues të Kosovës, Sokol Zogaj, tha se raporti ka dalë pozitiv dhe se nuk është konstatuar asnjë shkelje ligjore.

“Sa i përket procedurave të Shërbimit Korrektues të Kosovës janë respektuar të gjitha. Çka do të thotë se (të paraburgosurit të ndjerë) i është dhënë ndihma e parë në Qendrën e Paraburgimit kur i është përkeqësuar gjendja. Raporti i Inspektoratit ka qenë pozitiv, nuk ka pasur asnjë shkelje ligjore”, tha Zogaj për KALLXO.com.

46-vjeçari Naser Makolli vdiq të hënën pasdite në Qendrën e Mjekësisë Familjare në Lipjan ku ishte dërguar pas problemeve shëndetësore të shfaqura gjatë qëndrimit në Qendrën Korrektuese të Lipjanit.

http://kallxo.com/vdes-nje-paraburgosur/

Vdekja e Makollit rindezi debatin rreth vdekjes së Astrit Deharit në Qendrën e Paraburgimit në Prizren, pasi që Naser Makolli ishte njeriu i parë që e gjeti aktivistin e Vetëvendosjes pa shenja jete në qelinë e tij.

http://kallxo.com/vdekja-e-te-paraburgosurit-rindez-debatin-per-vdekjen-e-astrit-deharit/

Trupit të Makollit i është bërë autopsia dhe rezultatet nuk priten të publikohen para përfundimit të kësaj jave ose fillimit të javës së ardhshme.

http://kallxo.com/rezultatet-e-autopsise-se-naser-makollit-deri-ne-fund-te-javes/

Në një intervistë ekskluzive për KALLXO.com, vëllai i viktimës, Hysen Makolli, tha se vëllai i tij nuk ka vuajtur më parë nga ndonjë sëmundje.

Sipas tij, diçka ka ndodhur me të sepse, sipas tij, brenda një muaji nga 115 kilogramë pesha e tij ka rënë në rreth 50 kilogramë.

http://kallxo.com/ekskluzive-flet-vellai-naser-makollit/