Avdullah Hoti - Foto: KALLXO.com
Hoti: Nuk do ta Lejojmë Këtë Qeveri të Kthejë Kosovën Prapa
Kryetari i grupit parlamentar të LDK-së, Avdullah Hoti, tha sot në seancën e jashtëzakonshme se është e pafalshme që 18 vjet pas luftës të kthehet ndikimi plotë i Beogradit në vendimmarjen e institucioneve të Kosovës.
“Qytetarët e Kosovës nuk do t’ua falin këtë njerëzve që thirren në heroizma e bëjnë pazare me Beogradin… Disa nga këta janë bërë pjeë e historisë së turpshme”, theksoi ai.
“LDK nuk do ta lejojë këtë Qeveri të kthejë Kosovën prapa”, shtoi Hoti, duke e paralajmëruar Qeverinë Haradinaj se do të përballet me opozitë që nuk është parë më parë.
Në Kuvendin e Kosovës u diskutua rreth parimeve programore të Qeverisë.
Vendimi për seancën e jashtëzakonshme u mor nga Kryesia e Kuvendit të Kosovës, e cila e shqyrtoi kërkesën e grupeve parlamentare të Lëvizjes Vetëvendosje dhe të LDK-së për mbajtje të seancës së jashtëzakonshme.
Vetëvendosje dhe LDK kërkuan dje që një mbledhje e jashtëzakonshme të mbahet sot në ora 12:00, për shkak të mungesës së debatit në seancën e 9 shtatorit lidhur me parimet programore të Qeverisë së Republikës së Kosovës.
Gjatë seancës së djeshme, tashmë kryeministri Ramush Haradinaj në fillim të mbledhjes ku do të votohej Qeveria e drejtuar prej tij, tha se ka përgatitur vetëm disa orientime programore, duke premtuar se “në të ardhmen do të përgatitet një program qeveritar”.
Ndryshe, Ramush Haradinaj është zgjedhur dje kryeministër i Kosovës.
Qeveria e drejtuar prej tij mori 61 vota për dhe një abstenoi.
Në momentin e votimit, deputetët e Vetëvendosjes, të LDK-së dhe Alternativës e kanë lëshuar sallën.
Ndërkohë, kryetari i Kuvendit të Kosovës, Kadri Veseli, ka ndërprerë seancën e jashtëzakonshme me kërkesën e kryetarit të grupit parlamentar të LDK-së, Avdullah Hotit.