Gjykata e Apelit kthen në rigjykim rastin e vrasjes së Donjeta Pajazitajt
Burime të KALLXO.com kanë marrë vesh se Gjykata e Apelit ka vendosur që rastin e vrasjes së Donjeta Pajazitaj ta kthejë në rigjykim.
Donjeta Pajazitaj ishte gjetur e vdekur në bjeshkët e Strellcit të Deçanit në dhjetor të vitit 2015, gjashtë javë pasi ishte raportuar e zhdukur nga familjarët.
Gjykata Themelore në Pejë në mars të këtij viti e ka shpallur të pafajshëm Naser Pajazitajn nën akuzën për vrasjen e Donjeta Pajazitajt.
Kurse për veprën penale të armëmbajtjes pa leje të njëjtit i kishte shqiptuar dënim me burgim prej 2 vjet e 4 muaj.
https://kallxo.com/gjykata-merr-vendimin-per-rastin-e-vrasjes-se-donjeta-pajazitajt/
Aktakuza ndaj Naser Pajazitajt thotë se derisa Donjeta Pajazitaj ishte duke shkuar në punë, i akuzuari kishte ndalur veturën dhe e kishte marrë atë “duke ecur në këmbë në drejtim të fshatit Strellc i Epërm”.
“Kur arrin te “Kroni i Lajthisë” fillimisht e privon me armë dhe duke shtënë dy herë në kokë e me pas për të humbur gjurmë të njëjtën e mbulon me disa drunj, dhe largohet nga vendi i ngjarjes”, kishte thënë prokuroria në njërën nga seancat gjyqësore.
Përveç veprës penale të vrasjes së rëndë, Naser Pajazitaj akuzohet edhe për dy vepra tjera të armëmbajtjes pa leje.
https://kallxo.com/apeli-shqyrton-rastin-e-vrasjes-se-donjeta-pajazitajt-proteste-para-gjykates/
Në njërën nga seancat gjyqësore të këtij rasti, vëllai i Donjeta pajazitajt e kishte grushtuar të dyshuarin për vrasje, Naser Pajazitaj, derisa ky i fundit po largohej nga salla e gjyqit.
Në lidhje me akuzat për vrasjen e Donjeta Pajazitaj, i akuzuari Naser Pajazitaj ishte deklaruar i pafajshëm para trupit gjykues, duke u betuar se nuk ka të bëjë me vrasjen e kushërirës së tij.
https://kallxo.com/vellai-donjeta-pajazitajt-grushton-te-akuzuarin-pas-seances/