Ilustrim

Thatësirat dhe djegiet e hamulloreve ndër shkaktarët kryesorë të zjarreve të fundit

Mungesa e reshjeve atmosferike në vendin tonë, ka bërë që të kemi tharje të mëdha të tokës, të drunjëve dhe bimëve, andaj kohëve të fundit kemi rritje enorme të zjarreve pyjore dhe fushore, të cilat po shkaktojnë dëme të mëdha në pyje, në toka bujqësore dhe në ambientin në përgjithësi.

Këtyre zjarreve po i kontribuojnë në masë të madhe edhe djegiet e qëllimshme të hamulloreve në arat e Kosovës, e që po shkaktojnë telashe mjaft të mëdha për njësitë e zjarrfikjes dhe shpëtimit, të cilët po e kanë shumë të vështirë që t’i kontrollojnë dhe lokalizojnë ato zjarre, duke marrë parasysh edhe erërat e shpeshta që fryjnë në këtë periudhë kohore, sidomos në viset malore. Por këto zjarre, për shkak të përhapjes së shpejt, gjithashtu po shkaktojnë edhe rrezikim të përgjithshëm të jetës së njerëzve dhe pronave të tyre.

Tahir Ahmeti

Duke pasur parasysh që në shumicën e rasteve faktori njeri është shkaktari kryesor i këtyre zjarreve, organet kompetente duhet të apelojnë tek qytetarët për kujdes të shtuar, në mënyrë që mos të ndizen zjarre në ambiente të hapura, mos të hedhen cigaret e ndezura në këto vende potencialisht të rrezikuara për shkaktim të zjarrit (ndonjëherë mjafton vetëm një cigare e ndezur të hedhet dhe pastaj të kemi zjarr me përmasa shumë të mëdha), si dhe mos të ndizen mbeturinat e ndryshme në këto ambiente. Është shumë e rëndësishme që fermerët të jenë në dijeni se në bazë të hulumtimeve të bëra të ekspertëve bujqësorë në Kosovë, është konstatuar se djegia e hamulloreve ka efekte negative duke shkatërruar masën bimore që gjendet në ara, pasi shndërrimi i hamulloreve në hi nuk ndihmon tokën, por vetëm e degradon atë, prandaj ata me djegiet e qëllimshme të hamulloreve në ara, vetëm sa i dëmtojnë tokat e tyre dhe rrezikojnë edhe prona të tjera nga përhapja e pakontrolluar e zjarrit.

Gjithashtu, gjithmonë duhet pasur parasysh që sipas ligjeve në fuqi të Republikës së Kosovës, inicimi i qëllimshëm i zjarrit që është me rrezik të përgjithshëm, është vepër penale dhe sanksionohet me burgim nga 6 muaj deri në 5 vjet.

Organet e rendit në Kosovë, duhet të jenë shumë më aktive në terren në mënyrë që personat e papërgjegjshëm që shkaktojnë zjarre të qëllimshme të marrin ndëshkimet e duhura ligjore. Vetëm në këtë mënyrë mundë të pakësohen këto zjarre të qëllimshme, të mos rrezikohet jeta e njerëzve dhe të mirave materiale, por në të njëjtën kohë edhe të ruhet ambienti i cili në masë të madhe po ndotet nga emetimi i mbetjeve të zjarreve.

 

Autori është njohës i çështjeve të emergjencave dhe bashkë-themelues i Qendrës Kërkimore për Politika të Sigurisë (SPRC)

05 Nëntor 2018 - 13:37

Tahir Ahmeti 05/11/2018 - 13:37
NDËRVEPRIMI0
Prishtina Insight
NA NDIQNI

Send this to a friend