Gjatë takimit mes Ministrit të Drejtësisë, Abelard Tahirit dhe Drejtorin e ri të Shërbimit Korrektues të Kosovës, Nehat Thaçi- Foto: Facebook (Arkiv)

Nehat Thaqi drejtor i Burgjeve deri në vendimin përfundimtar të gjykatës

Këshilli i Pavarur Mbikëqyrës i Shërbimit Civil të Kosovës, ka marrë vendim që të anuloj konkursin e datës 27 dhjetor 2017 i shpallur nga Ministria e Administratës Publike dhe rekomandimi i Komisionit për Vlerësimin e Kritereve për përzgjedhjen e kandidatit për pozitën Drejtor i Përgjithshëm në Shërbimin Korrektues të Kosovës.

Këtë pozitë të këtij konkursi e kishte fituar drejtori i tanishëm i Shërbimit Korrektues të Kosovës, Nehat Thaqi.

Vendimi erdhi pas një ankese të njërit nga kandidatët që kishte aplikuar për të njëjtën pozitë.

Përveç anulimit të konkursit, i njëjti këshill kishte thënë se “Obligohet Ministri i Ministrisë së Administratës Publike dhe Ministri i Drejtësisë në Qeverinë e Kosovës që brenda afatit prej 15 ditësh që nga dita e pranimit të vendimit të bëjnë zbatimin e tij”.

Për një muaj nuk ishte sqaruar se çfarë saktësisht është ndërmarrë pas vendimit të Këshillit të Pavarur Mbikëqyrës të Shërbimit Civil të Kosovës.

KALLXO.com ka kërkuar nga ana e Ministrisë së Drejtësisë të dijë se çfarë hapash janë ndërmarrë pas vendimit të këshillit dhe se a do të filloj nga pika zero i gjithë konkursi ku Nehat Thaqi ishte zgjedhur si drejtor i Shërbimit Korrektues të Kosovës.

Sipas Ministrisë së Drejtësisë, në përgjigjen drejtuar KALLXO.com, procesi i konkursit ka qenë transparent, ndërsa theksohet se i njëjti konkurs dhe i gjithë procesi është monitoruar edhe nga mekanizma të jashtëm, përkatësisht kompania britanike sipas marrëveshjes së Ambasadës Britanike dhe Qeverisë së Kosovës për pozitat e larta drejtuese, si dhe nga përfaqësuesit e EULEX-it.

“Palët e përfshira në këtë proces kanë dhënë vlerësimet e tyre, përkitazi me kandidatët, duke përfshirë edhe çështjen e vlerësimit të kritereve po ashtu edhe vlerësimet në proceset pasuese, me ç’ rast z. Thaqi ka marrë vlerësimin më të lartë në raport me konkurrentët tjerë”, thuhet në përgjigjen e Ministrisë së Drejtësisë drejtuar KALLXO.com.

Ministria e Drejtësisë për KALLXO.com thotë se janë refuzuar dy ankesa në lidhje me procesin e rekrutimit të pozitës drejtuese të SHKK-së.

Por çfarë ka ndodhur me vendimin e Këshillit të Pavarur Mbikëqyrës të Shërbimit Civil të Kosovës?

Pas vendimit të Këshillit i cili më pas i është dërguar edhe organeve kompetente të cilat kanë qenë të përfshira në këtë proces, Ministria e Administratës Publike ka ushtuar padi në Gjykatën Themelore të Prishtinës, duke i bashkangjitur edhe kërkesë për masë të parakohshme për shtyrjen e ekzekutimit të vendimit të Këshillit.

“Nga Ministria e Administratës Publike jemi njoftuar se Gjykata Themelore në Prishtinë, Departamenti për Çështje Administrative, me Aktvendimin A.nr.2550/18, ka aprovuar propozimin për shtyrje të ekzekutimit të vendimit të Këshillit të Pavarur Mbikëqyrës për Shërbimin Civil të Kosovës A.nr.520/2018 të datës 19.10.2018, andaj jemi në pritje të vendimit përfundimtarë të gjykatës përkitazi me këtë çështje”, thuhet në përgjigjen e Ministrisë së Drejtësisë për KALLXO.com.

KALLXO.com pati raportuar në lidhje me vendimin e Këshillit për konkursin për pozitën e Drejtorit të Përgjithshëm të burgjeve të Kosovës.

I gjithë vendimi nga ana e Këshillit Të Pavarur Mbikëqyrës të Shërbimit Civil të Kosovës, ishte marrë për shkak të një ankese nga kandidati Ali Gashi, i cili u ankua se e kanë diskualifikuar jashtëligjshëm nga procesi edhe pse i njëjti kishte plotësuar kriteret e konkursit.

Një muaj më parë kur edhe ishte marrë vendimi KALLXO.com kishte kontaktuar me Ministrin e Ministrisë së Drejtësisë, Abelard Tahiri, i cili kishte thënë për KALLXO.com se i mbetet Ministrisë së Administratës Publike (MAP) që ta sqarojë se çfarë procedurash do të ndjekë më tutje.

 

https://kallxo.com/ministri-flet-per-anulimin-e-konkursit-per-drejtor-te-burgjeve/?fbclid=IwAR1-7FMZ9kyawkhmTBdv_gp_zsFeQJSY4GYawTZ3vT4d-iiWsiRaojYR71k

 

Nehat Thaqi është emëruar me vendim të Qeverisë së Kosovës drejtor i burgjeve të vendit më 27 prill 2018.

 

https://kallxo.com/nehat-thaci-zgjidhet-drejtor-i-burxheve/

 

Por, në garën për të parin e burgjeve ishin pesë kandidatë.

Kundërkandidatë të tij ishin: Rasim Selmani, Enver Rrustemi, Burim Buleshkaj dhe Driton Bajramaj.

 

https://kallxo.com/pese-kandidate-synojne-postin-e-drejtorit-te-burgjeve/

 

Nehat Thaçi ishte vlerësuar, si nga paneli ashtu edhe nga britanikët si kandidati më i mirë në këtë pozitë në pozitën e dytë ishte vlerësuar Rasim Selmani dhe më pas Enver Rrustemi.

Më 12 mars u bë publike edhe në MAP, renditja e kandidatëve sipas projektit britanik.

Një muaj më pas, pasi Ministria e Drejtësisë kishte marrë rekomandimin e britanikëve, në prill drejtori i policisë në Mitrovicë u emëruar me vendim të Qeverisë së Kosovës drejtor i burgjeve të vendit.