Suspendohet Gjyqtari- Akuzohet për Deklarim të Rrejshëm
Zyhdi Haziri, kryetar i Gjykatës Themelore të Gjilanit ka konfimuar suspendimin e gjyqtarit Berat Spahiu.
“ Prokuroria e Pizrenit ka ngritur aktakuzë ndaj gjyqtarit Berat Spahiu nën dyshimin se ka kryer veprën penale deklarim i rrejshëm. Për këtë kam marrë vendim mbi suspendim”, tha Haziri.
Sipas Hazirit ishte Komisioni Disiplinor i KGJK-së që ka rekomanduar suspendimin me pagesë derisa lënda penale të kryhej.
Haziri tha se gjyqtari ka qenë i mirë dhe profesional gjatë kryerjes së detyrës së tij.
“Tash të gjitha gjykimet në emër të tij janë shtyrë në kohë të pacaktuar”,tha Haziri.
Ndërkohë gjyqtari Berat Spahiu, i kontaktuar nga Gazeta Jeta në Kosovë, tha se bëhet fjalë për një keqkuptim .
“ Besoj që ky keqkuptim do të sqarohet në gjykatë “, deklaroi Spahiu.
Ai tha se në aktakuzën kundër tij përmendet se vetura e blerë ka vlerën prej 5 mijë e 600 eurosh dhe shuma e përmendur bazohet në katalogun doganor.
Spahiu thotë se aktakuza është ngritur bazuar në kallëzimin penal nga Agjencia Kundër Korrupsion. Sipas tij AKK-ja pretendon se nuk është deklaruar saktë vlera e veturës në deklarimin e pasurisë për vitin 2012.
Por Spahiu thotë se vetura e tij ka vlerë më të vogël dhe se nuk ishte ai që e ka bërë zhdoganimin e saj.
“ Ata kanë theksuar se unë e kam bërë doganimin e tij, kurse Dokumenti Unik Doganor tregon se tjetërkush e ka bërë doganimin, këtu qëndron moskuptimi” tha gjyqtari Spahiu.
“Unë e kam kontratën që i kam dhënë 2 mijë e 500 euro dhe një Golf 2 të vitit 1987 me vlerë afër 1 mijë e 200 euro”, tha Spahiu.
Berat Spahiu është emëruar gjyqtar në vitin 2010 dhe ka gjykuar lëndët nga lëmia civile.